खा. सुनील तटकरे यांच्या वाढदिवसानिमित्त देवकान्हे ग्रामपंचायत हद्दीतील विद्यार्थ्यांना शैक्षणिक साहित्य व खाऊ वाटप.

कोलाड (श्याम लोखंडे)

रायगड रत्नागिरी जिल्ह्याचे लोकप्रिय खासदार तथा कोकण विकासाचे शिलेदार खा.सुनील तटकरे यांच्या वाढदिवसाचे औचित्य साधून रोहा तालुक्यातील देवकान्हे ग्राम पंचायत हद्दीतील प्राथमिक शाळेतील विद्यार्थ्यांना शालेय शैक्षणिक साहित्य आणि खाऊचे वाटप असा सुप्त उपक्रम राबविण्यात आला. सामाजिक कार्यकर्त्या तथा मराठी उद्योजक अंकिता नारायण कान्हेकर व नारायण कान्हेकर या दाम्पत्याने हद्दीतील बाहे, देवकान्हे, देवकान्हे आदिवासीवाडी, धानकान्हे आणि धानकान्हे आदिवासीवाडी येथील विद्यार्थ्यांना शालेय शैक्षणिक साहित्याचे वाटप करून शिक्षणाला प्रोत्साहन देण्याचा स्तुत्य संदेश दिला. तसेच यावेळी चिमुकल्या विद्यार्थ्यांना खाऊचेही वाटप करण्यात आले.

या कार्यक्रमास माजी उपसभापती बाळकृष्ण बामणे, देवकान्हे गोविंदा पथकाचे अध्यक्ष संतोष भोईर, सेवानिवृत्त मुख्याध्यापक सुरेश जंगम, देवकान्हे शाळा व्यवस्थापन समितीचे अध्यक्ष नितीन भोईर, शिक्षक वैशाली माळी,हणमंत हाके, महेश जगताप,सुगत राठोड, प्रणाली जंगम, रुची सामंत, रविंद्र कान्हेकर,जनसेवक संदेश गायकवाड, शरद कचरे, राम शेडगे,यांच्यासह ग्रामस्थ, पालक आदी शाळेतील विद्यार्थी मोठ्या संख्येने उपस्थित होते.

शिक्षण हा समाजपरिवर्तनाचा पाया असून विद्यार्थ्यांना शिक्षणासाठी आवश्यक साहित्य उपलब्ध करून देण्याचा हा उपक्रम कौतुकास्पद असल्याच्या भावना उपस्थितांनी व्यक्त केल्या. ग्रामीण व आदिवासी भागातील विद्यार्थ्यांच्या शैक्षणिक प्रवासाला बळ देणारा हा उपक्रम ठरल्याने सामाजिक, शैक्षणिक , कला, क्रीडा, सांस्कृतिक, आरोग्य, पर्यावरण, अशा विविध क्षेत्रात उत्तम कार्य करणारे नारायण कान्हेकर दाम्पत्यांनी सामाजिक जाणिवेचे सर्व स्तरांतून स्वागत करण्यात येत असून सामाजिक उत्तरदायित्वाची जाणीव ठेवत वाढदिवसाचे औचित्य साधून राबविण्यात आलेल्या या उपक्रमाचे परिसरात सर्वत्र कौतुक होत असून, अशा उपक्रमांतून विद्यार्थ्यांना शिक्षणासाठी प्रेरणा मिळण्याबरोबरच समाजात सकारात्मक संदेशही पोहोचत असल्याची भावना उपस्थितांनी व्यक्त केली.