ज्येष्ठांच्या सन्मानासोबतच त्यांच्या प्रश्नांच्या सोडवणुकीसाठी ठोस धोरण हवे!

आरोग्य, सुरक्षितता आणि आर्थिक तरतुदींकडे शासनाने गांभीर्याने लक्ष द्यावे – पी. बी. सरफळे रावसाहेब

रोहा प्रतिनिधी (संतोष सातपुते)

ज्येष्ठ नागरिक हे समाजाचे अनुभवसंपन्न मार्गदर्शक असून त्यांच्या ज्ञानाचा आणि अनुभवाचा उपयोग समाजाच्या प्रगतीसाठी होणे आवश्यक आहे. मात्र, बदलत्या सामाजिक परिस्थितीत ज्येष्ठ नागरिकांना आरोग्यविषयक समस्या, एकाकीपणा, आर्थिक अडचणी आणि सुरक्षिततेच्या प्रश्नांना सामोरे जावे लागत आहे. त्यामुळे ज्येष्ठांच्या प्रश्नांकडे केवळ सहानुभूतीने नव्हे, तर संवेदनशीलतेने आणि जबाबदारीने पाहण्याची गरज आहे, असे प्रतिपादन ज्येष्ठ नागरिक संघाचे अध्यक्ष पी. बी. सरफळे रावसाहेब यांनी केले.
जागतिक ज्येष्ठ नागरिक दिनानिमित्त आयोजित कार्यक्रमात ते बोलत होते. यावेळी ज्येष्ठ नागरिकांसह ज्येष्ठ महिलांनीही मोठ्या संख्येने उपस्थित राहून कार्यक्रमाला उत्स्फूर्त प्रतिसाद दिला.
यावेळी सरफळे म्हणाले की, वैद्यकीय क्षेत्रातील प्रगतीमुळे ज्येष्ठ नागरिकांचे आयुर्मान वाढत असले, तरी वाढत्या वयाबरोबर उद्भवणाऱ्या शारीरिक व मानसिक समस्या, एकाकीपणा आणि आर्थिक असुरक्षितता यांचा गांभीर्याने विचार होणे आवश्यक आहे. केंद्र सरकारने अटलबिहारी वाजपेयी यांच्या पंतप्रधानपदाच्या कार्यकाळात ज्येष्ठ नागरिकांसाठी स्वतंत्र धोरण जाहीर केले होते. मात्र, धोरणांची घोषणा आणि प्रत्यक्ष अंमलबजावणी यामध्ये मोठी तफावत आहे. ज्येष्ठांच्या कल्याणासाठी अर्थसंकल्पात पुरेशी तरतूद, दर्जेदार आरोग्य सुविधा, सामाजिक सुरक्षा आणि शासकीय योजनांची प्रभावी अंमलबजावणी होणे गरजेचे आहे. महाराष्ट्र शासनानेही यासाठी विशेष पुढाकार घ्यावा, अशी अपेक्षा त्यांनी व्यक्त केली.
ज्येष्ठांच्या सुरक्षिततेसाठी पोलिसांचे सहकार्य घ्या!
कार्यक्रमाला प्रमुख अतिथी म्हणून उपस्थित असलेल्या रोहा पोलीस ठाण्याच्या पोलीस निरीक्षकांनी ज्येष्ठ नागरिकांना सुरक्षिततेविषयी मार्गदर्शन केले. कोणत्याही अडचणीच्या प्रसंगी घाबरून न जाता पोलिसांची मदत घ्यावी. आपत्कालीन परिस्थितीत ११२ या हेल्पलाइन क्रमांकावर संपर्क साधावा. ज्येष्ठ नागरिकांच्या सुरक्षिततेसाठी पोलीस प्रशासन सदैव तत्पर असल्याचे त्यांनी सांगितले.
८० वर्षे पूर्ण केलेल्या ज्येष्ठांचा सन्मान; गुणवंत विद्यार्थ्यांचाही गौरव
कार्यक्रमात वयाची ८० वर्षे पूर्ण केलेल्या जयंत साठे, ललित गुजर सर, नारायण पी. पाटील, मारुती बा. राऊत, जयराम पवार, सुधाकर गडकरी, सुभाष देसाई, पांडुरंग धसाडे, सुनीता वि. देशमुख आणि मंदाकिनी सु. कुळकर्णी यांचा विशेष सन्मान करण्यात आला. तसेच शैक्षणिक क्षेत्रात विशेष प्राविण्य मिळविल्याबद्दल विनीत विनोद कापसे आणि साई म्हात्रे या विद्यार्थ्यांचा गौरव करण्यात आला. संस्थेचे अध्यक्ष पी. बी. सरफळे रावसाहेब आणि पोलीस उपनिरीक्षक श्री. खाडे यांच्या हस्ते शाल, श्रीफळ, सन्मानचिन्ह आणि गुलाबपुष्प देऊन सन्मानित करण्यात आले.
याप्रसंगी ज्येष्ठ नागरिक संघाचे सुभाष राजे आणि महंमद शेट डबीर यांनीही आपले मनोगत व्यक्त केले. ज्येष्ठ नागरिकांच्या आरोग्यविषयक समस्या, सामाजिक सुरक्षितता, शासकीय योजनांचा लाभ आणि दैनंदिन अडचणी यांवर विचारमंथन करण्यात आले.
कार्यक्रमाच्या यशस्वितेसाठी संघाचे उपाध्यक्ष एस. एन. गायकवाड, सचिव सुरेश मोरे सर, खजिनदार प्रकाश पाटील, चंद्रशेखर गुंड, नंदकुमार भादेकर, मंगेश जोशी, सुरेश मेथा, दिलीप शेवाळे, चंद्रशेखर अधिकारी तसेच शैलजा देसाई, अनुराधा धुमाळ, संध्या मळेकर, अक्षदा साखळकर, मंगला गाडमुळे, संजीवनी कडवेकर आदी पदाधिकारी व कार्यकर्त्यांनी विशेष परिश्रम घेतले.
ज्येष्ठ नागरिकांचा सन्मान हा केवळ एका दिवसापुरता मर्यादित न राहता त्यांच्या अनुभवाचा आदर करणे, त्यांच्या अडचणी सोडविणे आणि त्यांना सन्मानाने जगण्यासाठी आवश्यक सुविधा उपलब्ध करून देणे ही समाजाची सामूहिक जबाबदारी आहे, असा महत्त्वपूर्ण संदेश या कार्यक्रमातून देण्यात आला.