युवाशक्तीला रोजगाराची दिशा; प्रमोद म्हसकर प्रतिष्ठानच्या भव्य रोजगार मेळाव्याला उत्स्फूर्त प्रतिसाद!

६५ नामांकित कंपन्यांचा सहभाग; २,२३७ उमेदवारांची नोंदणी, ४३७ युवकांची जागेवरच निवड

रोहा प्रतिनिधी | संतोष सातपुते

रोहा येथे युवक-युवतींना रोजगाराच्या संधी उपलब्ध करून देत त्यांच्या उज्ज्वल भविष्यासाठी नवी वाट निर्माण करण्याच्या उद्देशाने श्री. प्रमोद म्हसकर सामाजिक प्रतिष्ठान व एकलव्य फाऊंडेशन यांच्या संयुक्त विद्यमाने आयोजित करण्यात आलेल्या भव्य रोजगार मेळावा २०२६ ला युवक-युवतींचा उत्स्फूर्त प्रतिसाद मिळाला.
रविवार, ३० ऑगस्ट २०२६ रोजी कालिदास हॉल, किल्ला येथे सकाळी ९ ते सायंकाळी ५ या वेळेत हा रोजगार मेळावा पार पडला. या मेळाव्यात तब्बल ६५ राष्ट्रीय व आंतरराष्ट्रीय नामांकित कंपन्यांनी सहभाग नोंदविला, तर विविध क्षेत्रांत रोजगाराच्या अपेक्षेने आलेल्या २,२३७ उमेदवारांनी नोंदणी केली.
रोजगार मेळाव्यातील निवड प्रक्रियेत १,२२१ उमेदवारांची दुसऱ्या फेरीसाठी निवड करण्यात आली. विशेष म्हणजे, ४३७ उमेदवारांची जागेवरच निवड झाल्याने उपस्थित युवक-युवतींच्या चेहऱ्यावर आनंद आणि समाधानाचे वातावरण पाहायला मिळाले.
रोजगार मेळाव्याची ठळक वैशिष्ट्ये
६५ नामांकित कंपन्यांचा सहभाग
२,२३७ उमेदवारांची नोंदणी
१,२२१ उमेदवार दुसऱ्या फेरीसाठी पात्र
४३७ उमेदवारांची जागेवरच निवड
युवकांच्या हाताला काम आणि त्यांच्या कौशल्याला योग्य संधी मिळावी, या उद्देशाने आयोजित करण्यात आलेल्या या रोजगार मेळाव्यामुळे रोहा व परिसरातील युवकांसाठी रोजगाराची नवी दारे खुली झाली आहेत. रोजगाराच्या माध्यमातून युवकांच्या स्वप्नांना नवी दिशा देण्याचा हा उपक्रम निश्चितच कौतुकास्पद ठरला.
“युवकांच्या उज्ज्वल भविष्यासाठी रोजगार निर्मितीचा संकल्प कायम सुरू राहणार,” असा निर्धार श्री. प्रमोद म्हसकर सामाजिक प्रतिष्ठानच्या वतीने व्यक्त करण्यात आला.
मा. श्री. प्रमोदशेठ म्हसकर यांच्या संकल्पनेतून साकारलेल्या या उपक्रमामुळे युवकांना केवळ रोजगाराच्या संधीच उपलब्ध झाल्या नाहीत, तर त्यांच्या करिअरला नवी दिशा देण्याचे प्रभावी व्यासपीठही मिळाले. त्यामुळे ‘युवाशक्तीला दिशा आणि रोजगाराला चालना’ देणारा हा रोजगार मेळावा यशस्वी ठरल्याची भावना व्यक्त होत आहे.