चांगू काना ठाकूर आर्ट्स, कॉमर्स अँड सायन्स कॉलेज, न्यू पनवेल ( अधिकारप्रदत्त स्वायत्त) येथील रसायनशास्त्र विभागाच्या वतीने वळवली गावात रसायनशास्त्र जनजागृती कार्यक्रम उत्साहात संपन्न
नवीन पनवेल जनार्दन भगत शिक्षण प्रसारक संस्थेच्या चांगू काना ठाकूर आर्ट्स, कॉमर्स अँड सायन्स कॉलेज, न्यू पनवेल ( अधिकारप्रदत्त स्वायत्त) येथील रसायनशास्त्र विभागाच्या वतीने “रसायनशास्त्र विषयाचे महत्त्व आणि दैनंदिन जीवनातील उपयोग” या विषयावर जनजागृती कार्यक्रम उत्साहात पार पडला. हा कार्यक्रम मंगळवार, दिनांक १७ मार्च २०२६ रोजी सकाळी ९ वाजता रायगड जिल्हा परिषद शाळा, वळवली (पनवेल महानगरपालिका क्षेत्र) येथे आयोजित करण्यात आला होता.
लोकनेते माजी खासदार रामशेठ ठाकूर तसेच आमदार प्रशांत ठाकूर यांच्या शिक्षणविस्ताराच्या विचारातून प्रेरित होऊन हा उपक्रम राबविण्यात आला. कार्यक्रमात विद्यार्थ्यांना रसायनशास्त्राचे दैनंदिन जीवनातील उपयोग, विषयाचे महत्त्व आणि विज्ञाननिष्ठ दृष्टिकोन विकसित करण्याबाबत सविस्तर मार्गदर्शन करण्यात आले.
कार्यक्रमासाठी महाविद्यालयाचे प्राचार्य प्रा. (डॉ.) एस. के. पाटील यांचे मार्गदर्शन लाभले. रसायनशास्त्र विभाग प्रमुख प्रा. डॉ. बी. व्ही. जाधव यांनी कार्यक्रमाचे नियोजन व समन्वय साधला. सीकेटी महाविद्यालयाचे प्राध्यापक तथा वळवली गावाचे सुपुत्र डॉ. शैलेश वाजेकर यांच्या पुढाकाराने कार्यक्रमाचे आयोजन करण्यात आले.
या वेळी अॅक्टिव्हिटी कोऑर्डिनेटर डॉ. व्ही. एस. कांबळे, श्री. राहुल पाटील तसेच नॉन-टीचिंग स्टाफमधील श्री. चंद्रकांत परकाळे उपस्थित होते. शाळेच्या मुख्याध्यापिका सौ. ज्योती घोसाळकर यांनी मोलाचे सहकार्य केले. शाळेच्या वतीने सौ. रेश्मा पाटील यांनी स्वागत केले, तर श्री. दयानंद मोकल यांनी आभार प्रदर्शन केले.
कार्यक्रमात विद्यार्थ्यांनी उत्स्फूर्त सहभाग नोंदवला. या उपक्रमामुळे विद्यार्थ्यांमध्ये विज्ञानाविषयी उत्सुकता वाढून रसायनशास्त्र विषया बद्दलची भीती दूर होण्यास मदत झाली. तसेच महाविद्यालय व शाळा यांच्यातील शैक्षणिक सहकार्य अधिक दृढ झाले असून भविष्यातही अशा उपक्रमांचे आयोजन करण्यात येणार असल्याची माहिती आयोजकांनी दिली.