रोटरी क्लब ऑफ रोहा सेंट्रलतर्फे नगर परिषद शाळा क्र. १० मधील विद्यार्थ्यांना शैक्षणिक साहित्याचे वाटप

रोहा प्रतिनिधी : संतोष सातपुते

विद्यार्थ्यांमध्ये शिक्षणाची आवड वाढावी आणि गरजू विद्यार्थ्यांना शैक्षणिक साहित्याची मदत मिळावी या उद्देशाने रोटरी क्लब ऑफ रोहा सेंट्रलच्या वतीने रोहा नगर परिषद कै. प्रफुल्ल शेठ बारटके मंगलवाडी शाळा क्र. १० येथे विद्यार्थ्यांना शैक्षणिक साहित्याचे वाटप करण्यात आले. रोटरी क्लब ऑफ रोहा सेंट्रलचे अध्यक्ष श्री. विजय दिवकर यांच्या पुढाकारातून हा उपक्रम उत्साहात पार पडला.
शैक्षणिक साहित्य मिळाल्याने विद्यार्थ्यांमध्ये आनंदाचे आणि उत्साहाचे वातावरण निर्माण झाले. रोटरी क्लब ऑफ रोहा सेंट्रल ही संस्था शिक्षण, आरोग्य, रक्तदान, दंतचिकित्सा शिबिरे तसेच विविध सामाजिक उपक्रमांद्वारे सातत्याने समाजसेवा करत असून, शहराबरोबरच दुर्गम आदिवासी भागातील नागरिकांनाही मदतीचा हात देत असते.
यापूर्वीही सन २०२६ मध्ये या संस्थेने नगरपालिका शाळा क्र. १, ९ व १० (मंगलवाडी संकुल) येथे सुंदर हस्ताक्षर स्पर्धा आणि बालकांच्या काव्यवाचन स्पर्धांचे आयोजन करून विजेत्या विद्यार्थ्यांना बक्षिसांचे वितरण केले होते. त्यामुळे विद्यार्थ्यांमध्ये शैक्षणिक आणि सर्जनशील उपक्रमांविषयी विशेष उत्साह निर्माण झाला आहे.
कार्यक्रमाची सुरुवात मान्यवरांच्या हस्ते दीपप्रज्वलनाने झाली. यावेळी रोहा नगर परिषदेचे शिक्षण सभापती मा. श्री. रविंद्र चाळके, गटनेते श्री. महेंद्र गुजर, पाणीपुरवठा सभापती श्री. मयुर दिवेकर, रोटरी क्लब ऑफ रोहा सेंट्रलचे अध्यक्ष श्री. विजय दिवकर, सचिव श्री. राकेश कागडा, श्री. धर्मिन कंसारा, शाळा व्यवस्थापन समितीचे अध्यक्ष श्री. अमित सावंत, उपाध्यक्ष श्री. संदीप शेवाळे, श्री. मोरे सर आदी मान्यवर उपस्थित होते.
यावेळी मनोगत व्यक्त करताना श्री. मयुर दिवेकर यांनी श्री. विजय दिवकर व सौ. संध्या दिवकर या दाम्पत्याच्या सामाजिक कार्याचे विशेष कौतुक केले. शाळा क्र. १० चे मुख्याध्यापक श्री. ईश्वर लाडे, सर्व शिक्षकवृंद तसेच विद्यार्थी मोठ्या संख्येने उपस्थित होते.
कार्यक्रमाचे प्रास्ताविक शिक्षिका सौ. संध्या विजय दिवकर यांनी केले, तर सूत्रसंचालन श्री. पानवकर यांनी केले. सामाजिक बांधिलकी जपत विद्यार्थ्यांच्या शैक्षणिक प्रगतीसाठी राबविण्यात आलेल्या या उपक्रमाचे सर्व स्तरांतून कौतुक करण्यात येत आहे.