अॅड. अनिषा शिंदे यांना भारती विद्यापीठाचे सुवर्णपदक; एल.एल.एम. परीक्षेत दैदीप्यमान यश
रोहा प्रतिनिधी (संतोष सातपुते)
भारती विद्यापीठ (अभिमत विश्वविद्यालय) येथे नुकत्याच पार पडलेल्या पदवीदान समारंभात अॅड. अनिषा अनिल शिंदे यांनी एल.एल.एम. (LL.M.) पदवीच्या परीक्षेत प्रथम क्रमांक मिळवून सुवर्णपदक प्राप्त केले आहे. त्यांच्या या अभूतपूर्व यशामुळे रोहा तालुक्यात सर्व स्तरांतून अभिनंदनाचा वर्षाव होतो आहे.
अनिषा शिंदे यांनी आपल्या शैक्षणिक कारकिर्दीत सातत्य राखत आणि कठीण परिश्रम, सखोल ज्ञान तसेच चिकाटीच्या जोरावर विद्यापीठाच्या गुणवत्ता यादीत सर्वोच्च स्थान मिळवले. २३ एप्रिल २०२६ रोजी आयोजित झालेल्या भारती विद्यापीठाच्या पदवीदान समारंभात केंद्रीय राज्यमंत्री मा. प्रतापराव जाधव यांच्या हस्ते त्यांना हे सुवर्णपदक प्रदान करण्यात आले.
अनिषा शिंदे यांचा अभ्यासातला दृष्टिकोन केवळ परीक्षेत उत्कृष्ट गुण मिळवण्यापुरता मर्यादित नाही, तर कायद्याचा वापर समाजातील सामान्य घटकांना न्याय मिळवून देण्यासाठी कसा केला जाऊ शकतो, यावर त्यांचा विश्वास आहे. यशाबद्दल बोलताना त्यांनी सांगितले, “नियोजित अभ्यास आणि प्राध्यापकांचे मार्गदर्शन यामुळेच मी हे यश मिळवू शकले.”
विधी क्षेत्रातील दिग्गज, मार्गदर्शक, मित्रपरिवार आणि नातेवाईक यांनी अॅड. अनिषा शिंदे यांचे अभिनंदन केले आहे. त्यांचा हा यशस्वी प्रवास महिला वकिलांसाठी प्रेरणादायक ठरला आहे आणि त्यांनी या क्षेत्रात एक नवीन आदर्श निर्माण केला आहे.
भविष्यात विधी क्षेत्रात संशोधन व वकिली व्यवसायाद्वारे न्यायदान प्रक्रियेत मोलाचे योगदान देण्याचा त्यांचा मानस आहे.