रोह्यातील अर्णव सलागरेची राष्ट्रीय स्तरावर झेप
राष्ट्रीय गणित स्पर्धा २०२६ मध्ये २०० पैकी २०० गुणांसह प्रथम क्रमांक

रोहा प्रतिनिधी – संतोष सातपुते

रोहा येथील ग्रेगोरियन पब्लिक स्कूलच्या इयत्ता दहावीतील विद्यार्थ्याने अर्णव अमर सलागरे यांनी राष्ट्रीय स्तरावर उल्लेखनीय यश संपादन केले आहे. जिव्हाळा उद्योग समूह आयोजित व स्मार्ट अकॅडमी, अहिल्यानगर यांच्या सहकार्याने घेण्यात आलेल्या राष्ट्रीय गणित स्पर्धा २०२६ मध्ये त्यांनी देशभरातील विद्यार्थ्यांमध्ये प्रथम क्रमांक पटकावला आहे.
दि. ३१ मे २०२६ रोजी झालेल्या या स्पर्धेत अर्णवने उत्कृष्ट कामगिरी करत २०० पैकी २०० गुण मिळवत शंभर टक्के यश संपादन केले. या यशामुळे रोहा तालुका, रायगड जिल्हा तसेच महाराष्ट्राचे नाव राष्ट्रीय स्तरावर उज्ज्वल झाले आहे.
अर्णव सलागरे हा केवळ शैक्षणिक क्षेत्रातच नव्हे तर विविध उपक्रमांमध्येही सातत्याने उत्कृष्ट कामगिरी करणारा अष्टपैलू विद्यार्थी म्हणून ओळखला जातो. अबॅकस स्पर्धांमध्ये राज्य व राष्ट्रीय स्तरावर त्याने उल्लेखनीय यश मिळवले असून सर्व स्तरांवरील अबॅकस परीक्षा त्याने यशस्वीरित्या पूर्ण केल्या आहेत.
क्रीडा क्षेत्रातही त्याने बुद्धिबळ, नेटबॉल, कबड्डी, हँडबॉल आणि धावणे अशा विविध स्पर्धांमध्ये तालुका, जिल्हा व राज्य स्तरावर चमकदार कामगिरी केली आहे. कराटे क्षेत्रात ज्युनिअर ब्लॅक बेल्ट प्राप्त करून अलीकडेच झालेल्या राज्यस्तरीय स्पर्धेत प्रथम क्रमांक मिळवत त्याने राष्ट्रीय स्पर्धेसाठी निवड मिळवली आहे.
शाळेने त्याच्या सर्वांगीण प्रगतीची दखल घेत त्याची मुख्य विद्यार्थी प्रतिनिधी (हेड बॉय) म्हणून निवड केली आहे. शैक्षणिक गुणवत्ता, क्रीडा कौशल्य, शिस्त आणि नेतृत्वगुण यांचा उत्कृष्ट संगम असलेला विद्यार्थी म्हणून अर्णवचे सर्वत्र कौतुक होत आहे.
त्याच्या या यशामागे सातत्यपूर्ण मेहनत, शिक्षकांचे मार्गदर्शन आणि पालकांचे प्रोत्साहन असल्याचे मानले जात आहे. या यशाबद्दल विविध स्तरांतून अभिनंदनाचा वर्षाव होत असून भविष्यात तो आणखी मोठी झेप घेईल, असा विश्वास व्यक्त केला जात आहे.
अर्णव अमर सलागरे याचे मनःपूर्वक अभिनंदन व उज्ज्वल भविष्यासाठी हार्दिक शुभेच्छा!