साईनाथ धुळे यांची मनसेच्या रोहा तालुका अध्यक्षपदी नेमणूक राज ठाकरे यांच्या आदेशाने 167 गावांची जबाबदारी
प्रतिनिधी दिपक सोनावणे
दि. 18:* महाराष्ट्र नवनिर्माण सेनेचे अध्यक्ष मा. राजसाहेब ठाकरे यांच्या आदेशाने रोहा येथील निष्ठावंत मनसैनिक श्री. साईनाथ धुळे यांची *मनसे तालुका अध्यक्ष – रोहा तालुका (पेण विधानसभा क्षेत्र) पदी नेमणूक करण्यात आली आहे.
मनसेच्या राजगड मध्यवर्ती कार्यालयातून दिनांक 18 मे 2026 रोजी राजसाहेब ठाकरे यांच्या स्वाक्षरीचे नेमणूक पत्र धुळे यांना प्राप्त झाले. ही नेमणूक एक वर्षाच्या कालावधीसाठी करण्यात आली असून कामाचा अहवाल पाहून पुढील मुदतवाढीचा निर्णय घेतला जाईल, असे पत्रात नमूद आहे.
नेमणूक पत्रात राजसाहेबांचे स्पष्ट आदेश पक्षाची ध्येय-धोरणे व कार्यक्रम वेळोवेळी संघटनेत निष्ठेने राबवावेत. कामात कोणतीही कुचराई अथवा तडजोड स्वीकारली जाणार नाही. पदाधिकारी व सहकाऱ्यांकडून समाजाला कोणत्याही प्रकारचा उपद्रव होणार नाही याची दक्षता घ्यावी, अशा सूचना राजसाहेबांनी दिल्या आहेत.
यावेळी बोलताना नवनियुक्त तालुका अध्यक्ष साईनाथ धुळे म्हणाले, “2007 पासून मी मनसेचा निष्ठावंत सैनिक म्हणून काम करत आहे. राजसाहेबांनी माझ्यावर पेण विधानसभा 191 मधील सर्वात मोठा तालुका असलेल्या रोहा तालुक्यातील 167 गावे व रोहा शहराची जबाबदारी सोपवून पुन्हा एकदा विश्वास दाखवला. हा विश्वास सार्थ ठरवण्यासाठी मी व रोहा तालुक्यातील सर्व मनसैनिक जीव ओतून काम करू. मराठी बांधव, भगिनी व मातांना अभिमान वाटेल असेच काम आमच्या हातून होईल.”
शिस्तीत काम, उपद्रव न करता रिझल्ट हे ब्रीदवाक्य घेऊन रोहा तालुक्यात पक्ष संघटना अधिक मजबूत करण्यासाठी व आगामी काळात पेण विधानसभा मतदारसंघात मनसेचा भगवा फडकवण्यासाठी प्रयत्न करणार असल्याचे धुळे यांनी सांगितले.
साईनाथ धुळे यांच्या नेमणुकीबद्दल रोहा तालुक्यातील मनसैनिक व नागरिकांमध्ये उत्साहाचे वातावरण असून विविध स्तरातून त्यांच्यावर अभिनंदनाचा वर्षाव होत आहे.
