पर्यावरण स्नेही आठवडा बाजारातून विद्यार्थ्यांना व्यवहारज्ञानाची शिकवण
(प्रतिनिधी) – सत्यप्रसाद आडाव चणेरा
रायगड जिल्हा परीषद केंद्र शाळा न्हावे (मराठी) येथे बुधवार दिनांक १८ मार्च रोजी “पर्यावरण स्नेही आठवडा बाजार” मोठ्या उत्साहात भरवण्यात आला. या उपक्रमात विद्यार्थ्यांनी विविध खाद्यपदार्थांचे स्टॉल लावून प्रत्यक्ष विक्रीचा अनुभव घेतला.
या बाजारात चिकन पास्ता, सुकी भेळ, चायनीज भेळ, समोसा, पावभाजी, पाणीपुरी, कलिंगड, कैरी करमट, लिंबू सरबत, कोकम सरबत, कचोरी, करवंद लोणचे अशा अनेक प्रकारच्या खाद्यपदार्थांची आकर्षक मांडणी करण्यात आली होती. विद्यार्थ्यांनी स्वतः सादर केलेल्या पदार्थांची विक्री करताना ग्राहकांशी संवाद साधला, पैशांची देवाण-घेवाण केली आणि व्यवहार कौशल्य आत्मसात केले.
या उपक्रमामागील मुख्य उद्दिष्ट म्हणजे विद्यार्थ्यांना व्यवहारज्ञान, आर्थिक साक्षरता तसेच देवाण-घेवाणीचे महत्त्व समजावून देणे होय. तसेच पर्यावरणपूरक पद्धतीने बाजार भरवून स्वच्छता आणि शाश्वततेचा संदेश देण्यात आला.
कार्यक्रमासाठी शाळेचे मुख्याध्यापक गणेश बिरवाडकर, उपशिक्षक, शाळा व्यवस्थापन कमिटी अध्यक्ष, उपाध्यक्ष तसेच पालकांनी विद्यार्थ्यांना मार्गदर्शन केले. त्यांच्या मार्गदर्शनाखाली विद्यार्थ्यांनी हा उपक्रम यशस्वीपणे पार पाडला. विद्यार्थ्यांच्या उत्स्फूर्त सहभागामुळे आणि शिक्षकांच्या योग्य मार्गदर्शनामुळे हा “पर्यावरण स्नेही आठवडा बाजार” उपक्रम सर्वांच्या पसंतीस उतरला आणि विद्यार्थ्यांच्या सर्वांगीण विकासासाठी उपयुक्त ठरला.