रोहा तालुक्यातील आदिवासी विद्यार्थिनीची गगनभरारी
कोलाडच्या सपना वाघमारेची उच्च शिक्षणासाठी यूकेमधील नामांकित विद्यापीठांमध्ये निवड
रोहा प्रतिनिधी : संतोष सातपुते
रायगड जिल्ह्यातील रोहा तालुक्यातील कोलाड येथील आदिवासी विद्यार्थिनी कु. सपना राजेश वाघमारे हिने प्रतिकूल परिस्थितीवर मात करत उच्च शिक्षणासाठी थेट यूकेमधील नामांकित विद्यापीठांमध्ये निवड मिळवून मोठे यश संपादन केले आहे. तिची निवड युनिव्हर्सिटी ऑफ लीड्स तसेच क्वीन मेरी युनिव्हर्सिटी, यूके येथे झाली आहे.
आदिवासी विकास विभाग, महाराष्ट्र राज्य यांच्या माध्यमातून राबविण्यात येणाऱ्या ग्लोबल स्कॉलरशिप प्रोग्रॅम अंतर्गत हे यश मिळाले आहे. कु. सपना ही अपर आयुक्त आदिवासी विकास विभाग, ठाणे यांच्या अधिपत्याखालील एकात्मिक आदिवासी विकास प्रकल्प कार्यालय, घोडेगाव अंतर्गत आदिवासी मुलींच्या शासकीय वस्तीगृह, हडपसर पुणे येथे शिक्षण घेत आहे.
कातकरी समाजातील आणि अत्यंत दुर्गम भागातील असलेल्या सपनाने आर्थिक अडचणी व प्रतिकूल परिस्थितीवर मात करत हे यश मिळविले आहे. मोलमजुरी करून मुलीला शिक्षण देणाऱ्या तिच्या पालकांसाठी तसेच संपूर्ण आदिवासी विकास विभागासाठी ही अत्यंत अभिमानाची बाब ठरली आहे. मुलीने जागतिक स्तरावर शिक्षणासाठी झेप घेतल्याने कुटुंबीयांमध्ये आनंदाचे वातावरण आहे.
माननीय प्रकल्प अधिकारी श्री. प्रदीप देसाई यांच्या मार्गदर्शनाखाली तसेच गृहपाल अर्चना पवार यांच्या सहकार्याने आणि एकलव्य फाउंडेशनमार्फत मिळालेल्या शैक्षणिक मार्गदर्शनामुळे सपनाने परदेशात उच्च शिक्षण घेण्याचा निर्धार केला आणि तो यशस्वी करून दाखविला.
कु. सपना वाघमारे हिचे हे यश आदिवासी समाजातील विद्यार्थ्यांसाठी प्रेरणादायी ठरणार असून ग्रामीण व दुर्गम भागातील विद्यार्थीदेखील जिद्द, मेहनत आणि योग्य मार्गदर्शनाच्या जोरावर मोठी स्वप्ने पूर्ण करू शकतात, हे तिने सिद्ध करून दाखविले आहे.
