रोह्यातील डॉ. सी. डी. देशमुख विद्यालयाची कोकण परिक्षेत्रात तृतीय क्रमांकाची दमदार कामगिरी

रोहा प्रतिनिधी (संतोष सातपुते)

महाराष्ट्र राज्यात प्रभावीपणे राबविण्यात येणाऱ्या ‘स्टुडंट पोलीस कॅडेट’ (SPC) कार्यक्रमांतर्गत कोकण परिक्षेत्र स्तरावर तृतीय क्रमांक पटकावत रोहा नगर परिषदेच्या डॉ. सी. डी. देशमुख माध्यमिक विद्यालयाने उल्लेखनीय यश संपादन केले आहे. या उत्कृष्ट कामगिरीबद्दल विद्यालयाचा विशेष बहुमान करण्यात आला.
महाराष्ट्र दिनाचे औचित्य साधून पोलीस मुख्यालय, अलिबाग येथे आयोजित दिमाखदार सोहळ्यात राज्याच्या महिला व बालविकास मंत्री ना. अदिती तटकरे यांच्या हस्ते विद्यालयाला सन्मानित करण्यात आले. या वेळी विद्यालयाच्या स्टुडंट पोलीस कॅडेट प्रमुख समीर म्हात्रे यांचाही मान्यवरांच्या हस्ते प्रमाणपत्र व सन्मानचिन्ह देऊन गौरव करण्यात आला.
या यशाबद्दल बोलताना समीर म्हात्रे सर यांनी सांगितले की, “हा सन्मान केवळ माझा किंवा विद्यार्थ्यांच्या मेहनतीचा नसून तो एक सामूहिक प्रयत्नांचा परिपाक आहे.” त्यांनी रोहा नगर परिषदेच्या नगराध्यक्षा कुमारी वनश्री समीर शेडगे, शिक्षण सभापती रवींद्र चाळके, सर्व नगरसेवक, मुख्याधिकारी अजयकुमार एडके तसेच शाळा समिती सदस्य, शाळेच्या मुख्यध्यापिका सौ. स्मिता गुरव तसेच शिक्षक व शिक्षकेतर वर्ग यांचे वेळोवेळी मिळालेल्या मार्गदर्शन व पाठबळाचे विशेष आभार मानले.
पुढे ते म्हणाले की, सहकार्यपूर्ण आणि शिस्तबद्ध वातावरणामुळेच विद्यालयाने कोकण विभागात आपले वेगळे स्थान निर्माण केले आहे. पोलीस अधीक्षक रायगड-अलिबाग आचल दलाल, जिल्हा वाहतूक शाखेच्या पोलीस निरीक्षक सरिता चव्हाण आणि पोलीस हेड कॉन्स्टेबल प्रदीप झेमसे यांच्या विशेष मार्गदर्शनामुळे विद्यार्थ्यांना शिस्त व सुरक्षेचे प्रभावी धडे मिळाले.
या सोहळ्यास जिल्हाधिकारी डॉ. किरण जावळे, जिल्हा परिषदेच्या मुख्य कार्यकारी अधिकारी नेहा भोसले, उपमुख्य कार्यकारी अधिकारी तसेच विविध विभागांचे वरिष्ठ अधिकारी मोठ्या संख्येने उपस्थित होते.
दरम्यान, या यशाबद्दल रोहा शहर व परिसरातून विद्यालय आणि विद्यार्थी टीमचे सर्वत्र कौतुक होत असून पालक, विद्यार्थी व शिक्षणप्रेमींनी आनंद व्यक्त केला आहे.