मनसेच्या मध्य रायगड जिल्हा सचिवपदी अमोल पेणकर यांची फेरनियुक्ती

पक्षनिष्ठेची दखल; राज ठाकरे यांच्या हस्ते नियुक्तीपत्र, सर्व स्तरातून अभिनंदनाचा वर्षाव

रोहा प्रतिनिधी (संतोष सातपुते)

महाराष्ट्र नवनिर्माण सेनेच्या संघटनात्मक पुनर्रचनेच्या पार्श्वभूमीवर मध्य रायगड जिल्हा सचिवपदी अमोल पेणकर यांची फेरनियुक्ती करण्यात आली आहे. मुंबईतील शिवतीर्थ येथे झालेल्या कार्यक्रमात मनसे अध्यक्ष राज ठाकरे यांच्या हस्ते त्यांना नियुक्तीपत्र प्रदान करण्यात आले.
अमोल पेणकर हे महाराष्ट्र नवनिर्माण सेनेच्या स्थापनेपासून पक्षाशी एकनिष्ठ राहिलेले कार्यकर्ते म्हणून ओळखले जातात. त्यांनी रोहा शहराध्यक्ष, रोहा तालुकाध्यक्ष तसेच रायगड जिल्हा उपाध्यक्ष अशा विविध जबाबदाऱ्या यशस्वीपणे सांभाळल्या आहेत. पक्षसंघटना मजबूत करण्यासाठी त्यांनी शहर, तालुका आणि जिल्हास्तरावर सातत्याने कार्य करत अनेक संघटनात्मक उपक्रम, आंदोलने आणि जनहिताच्या प्रश्नांवर सक्रिय भूमिका बजावली आहे.
रायगड जिल्ह्यातील अनेक नेते इतर राजकीय पक्षांत दाखल झालेल्या काळातही अमोल पेणकर यांनी मनसेप्रती असलेली निष्ठा कायम ठेवली. विविध राजकीय पक्षांकडून प्रवेशासाठी प्रयत्न आणि प्रलोभने असूनही त्यांनी पक्षाशी एकनिष्ठ राहण्याचा निर्णय घेतला. त्यांच्या या भूमिकेची दखल घेत मनसे अध्यक्ष राज ठाकरे, युवा नेते अमित ठाकरे, मनसे नेते संदीप देशपांडे, संपर्क अध्यक्ष योगेश परुळेकर, सहसंपर्क अध्यक्ष राजेश येरुणकर तसेच मध्य रायगड जिल्हाध्यक्ष रामचंद्र म्हात्रे यांनी त्यांच्यावर पुन्हा विश्वास व्यक्त केला.
पक्षाच्या विविध आंदोलनांमध्ये सक्रिय सहभाग घेताना त्यांच्यावर काही गुन्हेही दाखल झाले होते. मात्र, कोणत्याही परिस्थितीत त्यांनी पक्षाची भूमिका ठामपणे मांडत संघटनात्मक कार्य सुरू ठेवले. त्यांच्या सातत्यपूर्ण कार्याची आणि पक्षनिष्ठेची पोचपावती म्हणून मध्य रायगड जिल्हा सचिवपदाची जबाबदारी पुन्हा त्यांच्याकडे सोपविण्यात आली आहे.
या फेर नियुक्ती नंतर मनसेचे पदाधिकारी, कार्यकर्ते तसेच विविध सामाजिक व राजकीय क्षेत्रातील मान्यवरांकडून अमोल पेणकर यांचे अभिनंदन करण्यात येत असून, त्यांच्या नेतृत्वाखाली मध्य रायगडमध्ये मनसेची संघटनात्मक ताकद आणखी वाढेल, असा विश्वास व्यक्त केला जात आहे.