हरलेल्या उमेदवाराचा “सदस्य” म्हणून बॅनरवर उल्लेख; संविधानिक पदाचा अवमान होत असल्याचा आरोप

चणेरा – सत्यप्रसाद आडाव

राष्ट्रवादी काँग्रेस पक्षाचे महाराष्ट्र प्रदेशाध्यक्ष तथा खासदार मा. श्री. सुनीलजी तटकरे यांच्या वाढदिवसानिमित्त विविध ठिकाणी शुभेच्छा बॅनर लावण्यात आले आहेत. मात्र, रोहा तालुक्यातील ग्रुप ग्रामपंचायत पहूर येथे लावण्यात आलेल्या काही बॅनरवर ग्रामपंचायत निवडणुकीत पराभूत झालेल्या उमेदवाराचा “सदस्य” असा उल्लेख करून त्याचा फोटो प्रसिद्ध करण्यात आल्याने राजकीय वर्तुळात चर्चा रंगली आहे.
स्थानिक नागरिकांच्या म्हणण्यानुसार, ग्रुप ग्रामपंचायत पहूरमध्ये एक सरपंच आणि सात सदस्य, अशी एकूण आठच लोकप्रतिनिधींची अधिकृत रचना आहे. अशा परिस्थितीत निवडणुकीत पराभूत झालेल्या व्यक्तीला “सदस्य” म्हणून दर्शविणे हे वस्तुस्थितीविरुद्ध असून संविधानिक व लोकशाही प्रक्रियेचा अवमान करणारे असल्याचा आरोप नागरिकांकडून करण्यात येत आहे.
नागरिकांचे म्हणणे आहे की, ग्रामपंचायतीत नवव्या सदस्याचे कोणतेही पद अस्तित्वात नाही. त्यामुळे अधिकृत पद नसताना एखाद्या व्यक्तीचा सदस्य म्हणून उल्लेख केल्याने नागरिकांमध्ये संभ्रम निर्माण होण्याची शक्यता आहे. संबंधित बॅनरचे फोटो सोशल मीडियावरील व्हॉट्सअॅप स्टेटसवरही मोठ्या प्रमाणात व्हायरल होत असून या प्रकाराची परिसरात चर्चा सुरू आहे.
याप्रकरणी भविष्यात शुभेच्छा बॅनर तयार करताना केवळ अधिकृत, सत्य व पडताळणी केलेली माहितीच प्रसिद्ध करावी, अशी मागणी स्थानिक नागरिकांकडून करण्यात येत आहे.