रोहा-अष्टमी नगरपरिषदेच्या विविध विकासकामांचे २७ जून रोजी लोकार्पण

रोहा प्रतिनिधी (संतोष सातपुते)

रोहा-अष्टमी नगरपरिषदेच्या हद्दीतील विविध विकासकामांचे लोकार्पण समारंभ शनिवार, दि. २७ जून २०२६ रोजी सकाळी १० वाजता खासदार श्री. सुनील तटकरे यांच्या प्रमुख उपस्थितीत संपन्न होणार आहे. या कार्यक्रमात शहराच्या विकासाला चालना देणाऱ्या विविध रस्ते, क्रीडा व उद्यान विकास कामांचे लोकार्पण करण्यात येणार आहे.
यामध्ये पुण्यश्लोक अहिल्यादेवी होळकर पुष्करणी उद्यानाचे सुशोभीकरण, कै. द. ग. तटकरे इनडोअर स्टेडियममधील बॅडमिंटन कोर्टाचे नूतनीकरण, अंधारआळी येथील वास्कर यांच्या घरापासून शिंदे यांच्या घरापर्यंत रस्ता डांबरीकरण, प्रभाग क्रमांक ८ मधील साई मंदिर ते एमआयडीसी बायपास रस्ता डांबरीकरण, अष्टमी कोळीवाडा ते मशिदीपर्यंत रस्ता डांबरीकरण, कुलकर्णी यांच्या घरापासून सत्यनारायण मंदिरापर्यंत रस्ता डांबरीकरण तसेच श्री धावीर महाराज चौक ते सोनार आळीकडे जाणाऱ्या रस्त्याचे डांबरीकरण या विकासकामांचा समावेश आहे.
कार्यक्रमाचे अध्यक्षस्थान खासदार तथा भारतीय पेट्रोलियम व गॅस नियामक मंडळाचे अध्यक्ष श्री. सुनील तटकरे भूषविणार आहेत. यावेळी महाराष्ट्र राज्याच्या महिला व बालविकास मंत्री कु. आदिती तटकरे तसेच कोकण स्थानिक स्वराज्य संस्था मतदारसंघाचे आमदार श्री. अनिकेत तटकरे यांची प्रमुख उपस्थिती लाभणार आहे.
नगराध्यक्षा कु. वनश्री अवनी समीर शेडगे, मुख्याधिकारी श्री. अजयकुमार एडके, उपनगराध्यक्ष श्री. अहमद हसनमिया दर्जी यांच्यासह नगरपरिषदेचे सर्व सभापती, नगरसेवक, स्वीकृत नगरसेवक, अधिकारी व कर्मचारी उपस्थित राहणार आहेत.
या लोकार्पण सोहळ्यास नागरिकांनी मोठ्या संख्येने उपस्थित राहावे, असे आवाहन रोहा-अष्टमी नगरपरिषदेच्या वतीने करण्यात आले आहे.