रोहा-अष्टमी नगरपरिषदेचा इंदौर येथे अभ्यास दौरा; आधुनिक कचरा व्यवस्थापन प्रकल्पांची पाहणी

रोहा | प्रतिनिधी : नंदकुमार बामुगडे
रोहा-अष्टमी नगरपरिषदेच्या नगराध्यक्ष , उपनगराध्यक्ष, सर्व सभापती तसेच नगरसेवकांनी इंदौर येथे अभ्यास दौरा करून तेथील आधुनिक व शाश्वत कचरा व्यवस्थापन प्रणालीची सखोल माहिती घेतली. देशातील स्वच्छ शहर म्हणून ओळख असलेल्या इंदौरमधील विविध अत्याधुनिक प्रकल्पांची यावेळी पाहणी करण्यात आली.

या दौऱ्यात Gobardhan Bio-CNG Plant येथे ओल्या कचऱ्यापासून Bio-CNG निर्मितीची प्रक्रिया प्रत्यक्ष समजून घेण्यात आली. दररोज सुमारे ५०० टन कचऱ्यावर प्रक्रिया करून अंदाजे १७ हजार किलो Bio-CNG तयार केले जाते. यातील मोठा हिस्सा सार्वजनिक बससेवेसाठी वापरला जात असून उर्वरित ग्रीन फ्युएल उद्योगांना पुरवले जाते.

त्यानंतर Material Recovery Facility (MRF) सेंटरला भेट देऊन सुका कचरा १८ ते २० प्रकारांमध्ये वर्गीकृत करून त्यावर प्रक्रिया कशी केली जाते, याची माहिती घेण्यात आली. तसेच Construction and Demolition Waste Plant येथे बांधकामातील कचऱ्यावर प्रक्रिया करून १० मिमी, २० मिमी aggregates, वाळू व पेव्हर ब्लॉक्स तयार करण्याची आधुनिक पद्धत पाहण्यात आली.

या अभ्यास दौऱ्यामुळे रोहा शहरातील कचरा व्यवस्थापन अधिक प्रभावी, पर्यावरणपूरक आणि शाश्वत करण्यासाठी निश्चितच दिशा मिळणार असल्याची भावना उपस्थितांनी व्यक्त केली.

हा अभ्यास दौरा खासदार सुनील तटकरे यांच्या विशेष सहकार्यामुळे यशस्वी झाल्याबद्दल नगराध्यक्ष वनश्री शेडगे यांनी त्यांचे मनःपूर्वक आभार मानले.