तरुण नेतृत्वाचा उदय : संजय मांडलूस्कर उपसभापतीपदी; कुणबी समाजाचा अभिमान वाढला – सुनील ठाकूर
रोहा प्रतिनिधी (संतोष सातपुते)
रोहा तालुक्यातील राजकारणात नव्या दमाच्या नेतृत्वाचा उदय होत असून, पुई गावचे सुपुत्र संजय मांडलूस्कर यांची अल्पवयातच पंचायत समितीच्या उपसभापतीपदी झालेली निवड ही विशेष चर्चेचा विषय ठरली आहे. त्यांच्या या यशामुळे कुणबी समाजाचा नावलौकिक उंचावला असल्याचे मत कुणबी समाज उन्नती संघ, मुंबई शाखेचे उपाध्यक्ष सुनील ठाकूर यांनी व्यक्त केले.
सामान्य कुटुंबातून पुढे आलेल्या संजय मांडलूस्कर यांनी कोणताही राजकीय वारसा नसताना केवळ जिद्द, चिकाटी आणि गावाच्या विकासाची तळमळ याच्या जोरावर राजकारणात स्वतःचे वेगळे स्थान निर्माण केले. पुई ग्रामपंचायत ताब्यात घेण्यासाठी त्यांनी ग्रामस्थांना एकत्र आणत संघर्षमय वाटचाल केली. या प्रयत्नांना यश मिळत आज गावात विकासाची गती वाढलेली दिसून येत आहे.
सुनील ठाकूर यांनी सांगितले की, “पुई हे माझे सासरवाडीचे गाव असल्याने आणि अनेक वर्ष कोलाड परिसरात वास्तव्यास असल्यामुळे संजय मांडुलूस्कर यांचा प्रवास मी जवळून पाहिला आहे. त्यांनी अत्यंत साध्या परिस्थितीतून मोठी झेप घेतली आहे.”
तटकरे कुटुंबीयांनी युवा कार्यकर्त्यांवर दाखवलेला विश्वासही यानिमित्त अधोरेखित झाला आहे. खासदार सुनील तटकरे, मंत्री आदिती तटकरे तसेच माजी आमदार अनिकेत तटकरे यांच्या मार्गदर्शनाखाली पुई गावात विकासकामांना गती मिळाल्याचे चित्र आहे.
“राजकारणात निष्ठा आणि जनसेवेची भावना असेल, तर कोणत्याही सामान्य तरुणालाही मोठी पदे मिळू शकतात, हे संजय मांडलूस्कर यांच्या निवडीने सिद्ध झाले आहे,” असेही ठाकूर यांनी नमूद केले.
संजय मांडुलूस्कर यांच्यासारख्या होतकरू आणि समाजाभिमुख तरुणाला उपसभापतीपद मिळाल्याने ग्रामीण भागाच्या विकासाला चालना मिळेल, तसेच कुणबी समाजाच्या प्रश्नांनाही योग्य न्याय मिळेल, असा विश्वास व्यक्त करत सुनील ठाकूर यांनी त्यांच्या निवासस्थानी भेट देऊन त्यांना शुभेच्छा दिल्या.