ज्ञानगंगा बहुविकलांग संस्थेची नवीन कार्यकारिणी जाहीर

दर्शना आठवले अध्यक्षपदी; पुढील पाच वर्षांसाठी नव्या पदाधिकाऱ्यांची निवड

रोहा प्रतिनिधी (संतोष सातपुते)

रोहा येथील विशेष मुलांच्या शैक्षणिक व सर्वांगीण विकासासाठी कार्यरत असलेल्या ज्ञानगंगा बहुविकलांग संस्था, रोहा या संस्थेची नवीन कार्यकारिणी गठीत करण्यात आली आहे. संस्थेच्या विशेष वार्षिक सर्वसाधारण सभेत आवाजी मतदानाने पुढील पाच वर्षांसाठी नवीन पदाधिकाऱ्यांची निवड करण्यात आली.
ज्ञानगंगा बहुविकलांग संस्थेअंतर्गत ‘प्रेरणा मतिमंद मुलांची शाळा’ सन २००६ पासून गेली २० वर्षे विनाअनुदानित तत्त्वावर अविरतपणे कार्यरत आहे. विशेष मुलांच्या पालकांनी एकत्र येऊन सुरू केलेल्या या शाळेचा आजवरचा प्रवास देणगीदार, पालक आणि समाजातील दातृत्वशील व्यक्तींच्या सहकार्यामुळे यशस्वी झाला आहे. विशेष मुलांना शिक्षण, संस्कार आणि आत्मनिर्भरतेची दिशा देण्याचे महत्त्वपूर्ण कार्य संस्था सातत्याने करत आहे.
संस्थेच्या विद्यमान कार्यकारिणीचा कार्यकाळ १ ऑक्टोबर २०२६ रोजी संपणार असल्याने नवीन कार्यकारिणीची निवड करण्यासाठी शुक्रवार, ११ सप्टेंबर २०२६ रोजी विशेष वार्षिक सर्वसाधारण सभेचे आयोजन करण्यात आले होते. संस्थेचे एकूण ६७ सभासद असून, सभेला २० सभासद उपस्थित होते. उपस्थित सभासदांच्या आवाजी मतदानाने नवीन कार्यकारिणीची निवड करण्यात आली.
नवीन कार्यकारिणीत अध्यक्षपदी दर्शना दीपक आठवले, उपाध्यक्षपदी संजय रोहिदास आर्ते, सचिवपदी गिरीश हरी मोरे, सहसचिवपदी श्रिया अनिकेत जोशी, खजिनदारपदी राजश्री सचिन आठवले, सहखजिनदारपदी वृषाली दीपक पराडकर, तर सदस्यपदी दिधेश कांतीलाल शहा यांची निवड करण्यात आली.
नवीन कार्यकारिणीच्या माध्यमातून संस्थेचे कार्य अधिक व्यापक करून विशेष मुलांना दर्जेदार शिक्षण, आवश्यक सुविधा आणि समाजाच्या मुख्य प्रवाहात आणण्यासाठी विविध उपक्रम राबविण्याचा निर्धार करण्यात आला. संस्थेच्या पुढील वाटचालीसाठी पालक, देणगीदार आणि समाजातील नागरिकांनी सहकार्य करावे, असे आवाहन करण्यात आले.