प्रति पंढरपुरात आषाढी एकादशीचा भक्तिमय सोहळा,अतिशय उत्साहात विठ्ठल-रखुमाईच्या

नामघोषाने म्हसळा गवळवाडी दुमदुमली

प्रतिनिधी /रवींद्र लाड 

म्हसळा:म्हसळा शहरातील प्रति पंढरपूर म्हणून ओळखल्या जाणाऱ्या गवळवाडी येथील श्री विठ्ठल-रखुमाई मंदिरात सालाबादप्रमाणे आषाढी एकादशीचा पवित्र उत्सव अत्यंत भक्तिभावाने व उत्साहपूर्ण वातावरणात साजरा करण्यात आला.पहाटेपासून मंदिर परिसरात विठ्ठल नामाचा गजर,भजन-कीर्तन आणि वारकऱ्यांच्या दिंडीमुळे संपूर्ण परिसर भक्तिरसात न्हाऊन निघाला.या सोहळ्यात पीएमश्री राजीप प्राथमिक शाळा,म्हसळा क्रमांक १,न्यू इंग्लिश स्कूल म्हसळा तसेच केशवराव खांबेटे सार्वजनिक वाचनालय यांच्या वतीने आकर्षक दिंडीचे आयोजन करण्यात आले. विद्यार्थ्यांनी,शिक्षकांनी,पालकांनी आणि वारकरी भक्तांनी उत्स्फूर्त सहभाग नोंदवत भजन,कीर्तन, नृत्यगीत सादर केले.त्यानंतर झालेल्या महाआरतीत सहभागी होत सर्वांनी विठ्ठल-रखुमाईचे दर्शन घेऊन आशीर्वाद प्राप्त केला.यावर्षी आषाढी एकादशी पूजेचा मान गवळवाडी ग्रामस्थ व महिला मंडळाचे सदस्या रेश्मा राजेंद्र खताते यांना मिळाला.सुधाकर जंगम यांनी केलेल्या मंत्रोपचारात त्यांच्या हस्ते विधिवत पूजा संपन्न झाली.या प्रसंगी ग्रामस्थ मंडळ व महिला मंडळाच्या वतीने उपस्थित भाविकांसाठी तीर्थप्रसादाचे आयोजन करण्यात आले.
भक्ती,परंपरा आणि सामाजिक ऐक्य यांचा सुंदर संगम घडविणारा हा आषाढी एकादशी महोत्सव वारकरी संप्रदायाच्या संस्कृतीचा जिवंत वारसा जपणारा ठरला. कार्यक्रमाच्या यशस्वी आयोजनाबद्दल आणि दानशूर भक्तांचे ग्रामस्थ,महिला मंडळ, वारकरी मंडळी तसेच सर्व सहभागींचे मंडळ अध्यक्ष अशोक काते, आणि पदाधिकारी यांनी स्वागत व कौतुक केले.