रोहा इंडस्ट्रियल असोसिएशनतर्फे पत्रकारांचा स्नेह मेळावा उत्साहात संपन्न.

रोहा | प्रतिनिधी  शैलेश गावंड : रोहा इंडस्ट्रियल असोसिएशन (RIA) यांच्या वतीने शुक्रवारी १७ जुलै रोजी धाटाव येथील आर आय ए सभागृहात रोहा तालुक्यातील पत्रकारांसाठी स्नेह मेळाव्याचे आयोजन करण्यात आले. पत्रकार आणि उद्योग क्षेत्र यांच्यातील संवाद अधिक दृढ व्हावा तसेच परस्पर सहकार्याची भावना वृद्धिंगत व्हावी, या उद्देशाने आयोजित करण्यात आलेल्या या कार्यक्रमाला पत्रकारांनी उत्स्फूर्त प्रतिसाद लाभला होता.

तर सदरच्या संवाद मेळावा प्रसंगी यावेळी मार्गदर्शन करताना असोसिएशनचे अध्यक्ष पी. पी.बार्देस्कर यांनी सांगितले की, रोहा-धाटाव एमआयडीसी ही राज्यातील इतर अनेक औद्योगिक क्षेत्रांच्या तुलनेत सर्वाधिक वृक्षसंपदा असलेली हरित एमआयडीसी आहे. पर्यावरण संवर्धनाबरोबरच येथील औद्योगिक परिसरातील अपघातांचे प्रमाणही इतर एमआयडीसीच्या तुलनेत लक्षणीयरीत्या कमी असल्याचे त्यांनी आवर्जून नमूद केले.

तसेच पुढे बोलताना त्यांनी लघु व मध्यम उद्योगांच्या वाढीमुळे स्थानिक स्तरावर रोजगारनिर्मिती होत असून विकासाला चालना मिळते. त्यामुळे नागरिकांचे राहणीमान उंचावण्यास मदत होत असल्याचेही त्यांनी स्पष्ट केले.

कार्यक्रमादरम्यान उपस्थित पत्रकारांना पर्यावरण संवर्धनाचा संदेश देण्यासाठी सुपारीच्या रोपांचे वाटप करण्यात आले. तसेच उपस्थितांसाठी स्नेहभोजनाचेही आयोजन करण्यात आले होते.

यावेळी असो.अध्यक्ष बारदेसकर, सेक्रेटरी कोळेकर, खजिनदार देशमुख आदी उपस्थित पत्रकार बहुसंख्येने उपस्थित होते तर कार्यक्रमाचे सूत्रसंचालन पराग फुकणे यांनी केले. यावेळी देशमुख साहेबांनी उपस्थितांचे आभार मानले. हा स्नेह मेळावा यशस्वी करण्यासाठी रोहा इंडस्ट्रियल असोसिएशनच्या पदाधिकारी, सदस्य व सर्व सहकाऱ्यांनी विशेष परिश्रम घेतले.