रोह्यात पूरस्थितीत भाजपचे मदतकार्य; प्रशासनासह कार्यकर्ते मैदानात

रोहा प्रतिनिधी (संतोष सातपुते)

रोहा तालुक्यात मुसळधार पाऊस आणि भिरा धरणातून झालेल्या मोठ्या विसर्गामुळे निर्माण झालेल्या पूरस्थितीत भारतीय जनता पक्षाने मदतकार्यात सक्रिय सहभाग घेतला. पूरग्रस्त नागरिकांच्या मदतीसाठी भाजपचे जिल्हा व तालुका पदाधिकारी, नगरसेवक आणि कार्यकर्ते विविध भागांत उतरल्याने राजकीय पातळीवरही या मदतकार्यात चांगलीच हालचाल पाहायला मिळाली.
भाजपचे रायगड जिल्हाध्यक्ष धैर्यशील पाटील, सतीश धारप आणि तालुकाध्यक्ष अमित घाग यांनी कार्यकर्त्यांना तातडीने पूरग्रस्तांच्या मदतीसाठी मैदानात उतरून प्रशासनाशी समन्वय साधण्याच्या सूचना दिल्या. त्यानुसार शहर आणि ग्रामीण भागात विविध ठिकाणी कार्यकर्त्यांनी नागरिकांना सुरक्षितस्थळी हलविणे, अन्नपॅकेट वाटप, जनावरांचे स्थलांतर तसेच आवश्यक मदत पुरविण्याचे काम केले.
रोहा शहरातील त्रिमूर्तीनगर, धनलक्ष्मी सोसायटी आणि गणेशनगर परिसरात भाजप युवा मोर्चाचे जिल्हा सरचिटणीस तथा नगरसेवक रोशन चाफेकर यांनी पूरग्रस्त कुटुंबांची भेट घेत त्यांच्या अडचणी जाणून घेतल्या. नगरपरिषदेचे मुख्याधिकारी अजयकुमार एडके यांच्याशी संपर्क साधून पूरग्रस्तांसाठी जेवणाच्या पॅकेटची व्यवस्था करण्यात आली.
या मदतकार्यात भाजप तालुका सरचिटणीस परेश चितळकर, युवा मोर्चा तालुका सरचिटणीस वैभव कुलकर्णी, शहराध्यक्ष अनिल घरजाळे, सिद्धांत मोरे तसेच शहराध्यक्ष सुमित रिसबूड यांनी सक्रिय सहभाग नोंदविला. ग्रामीण भागात तालुकाध्यक्ष अमित घाग यांनी कार्यकर्त्यांसह पूरग्रस्त गावांना भेटी देत मदतकार्याचा आढावा घेतला. काही ठिकाणी पुराच्या पाण्यात अडकलेल्या जनावरांची सुटका करण्यात आली, तर तळा परिसरात रुग्णवाहिकेची व्यवस्था करण्यात आली. वरसे येथे हाजी कोठारी यांनी रात्री उशिरापर्यंत नागरिकांना मदत केली.
दरम्यान, रोहा शहरात नगरपरिषद, पोलीस प्रशासन आणि विविध सामाजिक संस्थांनीही रात्रभर मदतकार्य सुरू ठेवले. नगराध्यक्ष वनश्री शेडगे यांच्या मार्गदर्शनाखाली नगरसेवकांनी आपल्या प्रभागांमध्ये परिस्थितीवर लक्ष ठेवून नागरिकांना सहकार्य केले.
पूरस्थिती काही प्रमाणात ओसरली असली तरी बाधित नागरिकांच्या पुनर्वसनासाठी प्रशासनासोबत समन्वय ठेवून भाजपचे पदाधिकारी व कार्यकर्ते पुढील काळातही सेवाकार्य सुरू ठेवतील, अशी माहिती तालुकाध्यक्ष अमित घाग यांनी दिली.