रोहा प्रेस क्लबच्या अध्यक्षपदी डॉ. श्याम लोखंडे यांची बिनविरोध निवड

मिलिंद अष्टीवकर यांची प्रमुख उपस्थितीत रोहा प्रेस क्लबची नवी कार्यकारिणी जाहीर;

रोहा प्रतिनिधी (संतोष सातपुते)

पत्रकारितेच्या क्षेत्रात उल्लेखनीय कार्य करणाऱ्या रोहा प्रेस क्लबच्या नव्या अध्यक्षांची व कार्यकारिणीची नुकतीच निवड करण्यात आली. ज्येष्ठ पत्रकार डॉ. श्याम लोखंडे यांची रोहा प्रेस क्लबच्या अध्यक्षपदी बिनविरोध निवड करण्यात आली असून पत्रकारांमध्ये समाधानाचे वातावरण निर्माण झाले आहे.
रोहा प्रेस क्लब ही संस्था रायगड प्रेस क्लब तसेच अखिल भारतीय मराठी पत्रकार परिषदेशी संलग्न असून जिल्ह्यातील जागृत, निर्भीड आणि समाजाभिमुख पत्रकारांची संघटना म्हणून ओळखली जाते. नव्या कार्यकारिणीच्या निवड प्रक्रियेचा कार्यक्रम माजी अध्यक्ष सुहास खरिवले यांच्या अध्यक्षतेखाली तसेच ज्येष्ठ पत्रकार राजेंद्र जाधव यांच्या मार्गदर्शनाखाली संपन्न झाला.
यावेळी अखिल भारतीय मराठी पत्रकार परिषदेचे अध्यक्ष मिलिंदजी अष्टीवकर यांची प्रमुख उपस्थिती लाभली. त्यांनी पत्रकार संघटनांच्या बळकटीकरणासाठी एकजुटीचे महत्त्व अधोरेखित करत नव्या कार्यकारिणीला शुभेच्छा दिल्या.
नवीन कार्यकारिणीमध्ये कार्याध्यक्षपदी सुहास खरिवले, उपाध्यक्षपदी जितेंद्र जाधव, उपाध्यक्षपदी अंजुम शेट्टे, सचिवपदी रवींद्र कान्हेकर, सहसचिवपदी दीपक भगत, खजिनदारपदी दीप वायडेकर, मुख्य संघटकपदी उद्धव आव्हाड, संघटकपदी संतोष सातपुते, संपर्क प्रमुखपदी विश्वजित लुमन, प्रसिद्धी प्रमुखपदी मरवडे तर सह प्रसिद्धी प्रमुखपदी सत्यप्रसाद आढाव यांची निवड करण्यात आली.
या पदग्रहण सोहळ्यास माजी अध्यक्ष राजेंद्र जाधव, शशिकांत मोरे, महेश बामुगडे यांच्यासह ज्येष्ठ व युवा पत्रकार मोठ्या संख्येने उपस्थित होते. नव्या कार्यकारिणीच्या माध्यमातून रोहा प्रेस क्लबची वाटचाल अधिक प्रभावीपणे पुढे जाईल, असा विश्वास उपस्थित मान्यवरांनी व्यक्त केला.