*रोहा: बनावट मोजणी नकाशाप्रकरणी तहसीलदारांची नगरपरिषदेला महत्त्वाची ताकीद*

रोहा:प्रतिनिधी समीर बामुगडे

रोहा (रायगड) मौजे रोहा येथील सर्वे नंबर ६१, प्लॉट नंबर ८ संदर्भात बनावट मोजणी नकाशा तयार करण्यात आल्याच्या तक्रारीत तथ्य असल्याचे प्रथमदर्शनी दिसून येत असल्याने, या नकाशाच्या आधारे कोणतीही बांधकाम परवानगी देऊ नये, असे कडक निर्देश तहसीलदार रोहा यांनी नगरपरिषदेला दिले आहेत.

रोहा येथील रहिवासी श्री. उमेश गोपाळदास वैष्णव यांनी दिनांक १०/०४/२०२६ रोजी तहसीलदार कार्यालयात तक्रार अर्ज दाखल केला होता. मो.र.नं. ७२/१९७८ अंतर्गत सर्वे नंबर ६१ मधील प्लॉट नंबर १ ते ८ चा मोजणी नकाशा खोटा बनविण्यात आल्याचा त्यांचा आरोप आहे.

चौकशीत धक्कादायक बाब समोर आली. उपअधीक्षक भूमि अभिलेख रोहा यांनी केलेल्या चौकशीत तत्कालीन कर्मचारी श्रीमती पुष्या जाधव आणि श्रीमती अंजना बनकर यांनी हे कबूल केले की, सदर नकाशाची नक्कल दप्तरी अभिलेखातील शीट फाईलमधून तयार करून पुरविण्यात आली. मात्र, कार्यालयाच्या अभिलेखात मो.र.नं. ७२/१९७८ चा मूळ नकाशा शोधूनही सापडलेला नाही, हे विशेष गंभीर आहे.

तहसीलदारांनी आपल्या पत्रात स्पष्ट नमूद केले आहे की, अद्याप उपअधीक्षक भूमि अभिलेख यांचा अंतिम अहवाल प्राप्त झालेला नसला तरी, बनावट नकाशाच्या आधारे बांधकाम परवानगी देणे सध्या योग्य ठरणार नाही. बांधकाम पूर्ण झाल्यानंतर नकाशा बनावट सिद्ध झाल्यास प्रकरण आणखी गुंतागुंतीचे होण्याची शक्यता असल्याने नगरपरिषदेने कोणतेही ना-हरकत प्रमाणपत्र देखील देऊ नये, असे तहसीलदारांनी बजावले आहे.

सध्या हितसंबंधित व्यक्तींच सुनावणी पूर्ण होताच अंतिम अहवाल सादर केला जाणार असून या प्रकरणाचा निकाल लवकरच लागणे अपेक्षित आहे.