*वरसे ग्रामपंचायत निवडणुकीचे बिगुल वाजले!*
*आरक्षण सोडतीसाठी १२ जून रोजी विशेष ग्रामसभा;* *नागरिकांना उपस्थितीचे आवाहन*

रोहा:समीर बामुगडे

वरसे, ता. रोहा (रायगड) : महाराष्ट्र शासनाच्या महसूल व वनविभागाच्या आदेशानुसार रोहा तालुक्यातील वरसे ग्रामपंचायतीची आरक्षण सोडत दिनांक १२ जून २०२६ रोजी विशेष ग्रामसभेद्वारे संपन्न होणार आहे. राज्य निवडणूक आयोगाच्या आदेशानुसार सन २०२४ व २०२५ मध्ये मुदत संपलेल्या ग्रामपंचायतींच्या सार्विक निवडणुकांसाठी हे आरक्षण सोडत कार्यक्रम जाहीर करण्यात आला असून वरसे ग्रामपंचायतीचाही यात समावेश आहे.

रोहा तहसील कार्यालयाच्या आदेशानुसार सहाय्यक महसूल अधिकारी श्री. भरत गुंड यांच्या अध्यक्षतेखाली वरसे ग्रामपंचायतीची आरक्षण सोडत सकाळी ११.०० वाजता सुरू होणार असून दुपारी ०२.३० वाजेपर्यंत संपूर्ण कार्यक्रम पार पडणार आहे. लोकप्रतिनिधित्व अधिनियम १९५० नुसार ही संपूर्ण प्रक्रिया पारदर्शकपणे राबविण्यात येणार आहे.

या विशेष ग्रामसभेत प्रभागनिहाय आरक्षणाची सोडत काढण्यात येणार असून अनुसूचित जाती, अनुसूचित जमाती, इतर मागासवर्गीय, महिला व सर्वसाधारण प्रवर्गांसाठी प्रभागांचे आरक्षण निश्चित केले जाणार आहे. तहसीलदार डॉ. किशोर देशमुख यांनी संपूर्ण कार्यक्रमाचे नियोजन केले असून सर्व संबंधित अधिकारी व कर्मचाऱ्यांना यापूर्वीच प्रशिक्षण देण्यात आले आहे.

वरसे ग्रामपंचायत हद्दीतील सर्व नागरिकांना या महत्त्वाच्या ग्रामसभेला मोठ्या संख्येने उपस्थित राहण्याचे आवाहन करण्यात येत आहे. लोकशाहीच्या या प्रक्रियेत सहभागी होणे हे प्रत्येक नागरिकाचे कर्तव्य असून आपल्या गावाच्या भवितव्यासाठी हा निर्णय अत्यंत महत्त्वाचा आहे. त्यामुळे एकही नागरिक या ग्रामसभेपासून वंचित राहू नये, असे आवाहन ग्रामपंचायतीतर्फे करण्यात येत आहे.