रोहा तालुक्यातील अनुराज ठाकूरची रायगड जिल्हा कुमार गट खो-खो संघात सलग दुसऱ्या वर्षी निवड

रोहा प्रतिनिधी (संतोष सातपुते)

पनवेल येथे नुकत्याच पार पडलेल्या रायगड जिल्हा कुमार गट खो-खो निवड चाचणी स्पर्धेत उत्कृष्ट खेळाचे प्रदर्शन करत जय बजरंग रोहा खो-खो संघाचा खेळाडू कु. अनुराज योगेश ठाकूर याची सोलापूर येथे होणाऱ्या ५२ व्या महाराष्ट्र राज्य कुमार गट अजिंक्यपद व निवड चाचणी खो-खो स्पर्धेसाठी रायगड जिल्हा कुमार गट संघात निवड करण्यात आली आहे.
विशेष म्हणजे अनुराज ठाकूरची सलग दुसऱ्या वर्षी रायगड जिल्हा संघात निवड झाली असून, मागील वर्षी देखील त्याने रायगड जिल्ह्याचे प्रतिनिधित्व करत उल्लेखनीय कामगिरी केली होती. सातत्यपूर्ण सराव, मेहनत, उत्तम फिटनेस आणि उत्कृष्ट खेळाच्या जोरावर त्याने पुन्हा एकदा जिल्हा संघात आपले स्थान कायम राखले आहे.
जय बजरंग रोहा खो-खो संघाच्या माध्यमातून अनुराजने विविध स्पर्धांमध्ये चमकदार कामगिरी करत आपली वेगळी ओळख निर्माण केली आहे. त्याच्या या यशाबद्दल जय बजरंग क्रीडा मंडळ रोहा, प्रशिक्षक, सहकारी खेळाडू तसेच परिसरातील क्रीडाप्रेमींनी त्याचे अभिनंदन करून पुढील स्पर्धेसाठी शुभेच्छा दिल्या आहेत.