रोहा येथे भरधाव मोटारसायकल अपघातात कब्बडीपट्टू अश्विन मिलगिरे १७ वर्षीय युवकाचा मृत्यू

रोहा प्रतिनिधी : संतोष सातपुते

रोहा-कोलाड मार्गावर भरधाव व बेदरकार मोटारसायकल चालविल्यामुळे झालेल्या भीषण अपघातात १७ वर्षीय युवकाचा दुर्दैवी मृत्यू झाल्याची घटना मंगळवारी (दि. २८ एप्रिल २०२६) पहाटे उघडकीस आली.
याबाबत रोहा पोलिस ठाण्यात गुन्हा दाखल करण्यात आला असून फिर्यादी नरेश नारायण मोरे (वय ५४, व्यवसाय नोकरी, रा. रोहा) यांनी तक्रार दिली आहे. मिळालेल्या माहितीनुसार, दि. २८ एप्रिल रोजी पहाटे सुमारे २ वाजण्याच्या सुमारास कोलाड-रोहा रोडवर इंडियन ऑईल पेट्रोल पंपाजवळ हा अपघात घडला.
विधीसंघर्षीत बालक विजय महेश कुमावत (वय १७, रा. सदासंयोग कॉलनी, वरसे, ता. रोहा) हा त्याच्या ताब्यातील पॅशन प्रो मोटारसायकल (क्र. MH-06/AX-1793) भरधाव व निष्काळजीपणे चालवत होता. यावेळी मोटारसायकलवर मागे बसलेला अश्विन शंकर मिलगिरे (वय १७, रा. सदासंयोग कॉलनी, वरसे) याचा तोल जाऊन तो रस्त्यावर डोक्यावर पडला. या अपघातात त्याला गंभीर दुखापत झाली आणि त्याचा मृत्यू झाला.
या प्रकरणी महेश कुमावत (रा. सदासंयोग कॉलनी, वरसे) तसेच संबंधित विधीसंघर्षीत बालक यांच्याविरुद्ध भारतीय न्याय संहितेच्या कलम १२५(अ), १२५(ब) तसेच मोटार वाहन कायद्यातील कलम १८४, १३४ अन्वये गुन्हा क्रमांक १०७/२०२६ दाखल करण्यात आला आहे.
जखमी युवकाला तात्काळ उपजिल्हा रुग्णालय, रोहा येथे दाखल करण्यात आले होते. मात्र उपचारादरम्यान त्याचा मृत्यू झाला. या घटनेमुळे परिसरात हळहळ व्यक्त केली जात आहे.
या घटनेचा पुढील तपास पोलीस हवालदार आशुतोष म्हात्रे करीत असून, वरिष्ठांच्या मार्गदर्शनाखाली तपास सुरू आहे.