खोपोली हादरली! मीळगाव डम्पिंग ग्राउंडला भीषण आग; नगर परिषदेच्या दुर्लक्षाने संताप उसळला

प्रतिनिधी नजीर पठाण खोपोली : शहरातील मीळगाव येथील डम्पिंग ग्राउंडला लागलेल्या भीषण आगीने खोपोलीकर अक्षरशः हादरले आहेत. काही मिनिटांतच आगीने रौद्ररूप धारण करत आकाशात काळ्या धुराचे ढग पसरले, तर परिसरात घबराटीचे वातावरण निर्माण झाले.
डम्पिंग ग्राउंडमध्ये साचलेल्या कचऱ्याला लागलेली ही आग इतकी भयानक होती की, दूरवरूनही ज्वाळा आणि धुराचे लोट दिसत होते. विषारी धुरामुळे नागरिकांना श्वसनाचा त्रास, डोळ्यांची जळजळ होत असून लहान मुले आणि ज्येष्ठ नागरिक विशेषतः त्रस्त झाले आहेत.

घटनेची माहिती मिळताच अग्निशमन दलाने घटनास्थळी धाव घेतली. मात्र कचऱ्याच्या प्रचंड ढिगाऱ्यामुळे आणि ज्वलनशील पदार्थांमुळे आग आटोक्यात आणण्यासाठी मोठी कसरत करावी लागत आहे.
दरम्यान, या घटनेनंतर नगर परिषदेच्या ढिसाळ कारभारावर संतापाचा उद्रेक झाला आहे. स्थानिकांनी आरोप केला की, डम्पिंग ग्राउंडच्या व्यवस्थापनाकडे सातत्याने दुर्लक्ष केले जात असून कोणत्याही प्रकारची अग्निसुरक्षा उपाययोजना करण्यात आलेली नाही. वारंवार सूचना देऊनही प्रशासनाने गांभीर्याने घेतले नाही, असा गंभीर आरोप नागरिकांनी केला.
“आज आग लागली, उद्या मोठा स्फोट झाला तर जबाबदार कोण?” असा संतप्त सवाल नागरिकांनी उपस्थित केला आहे.

सुदैवाने या घटनेत जीवितहानी झालेली नाही, मात्र या आगीने प्रशासनाच्या निष्क्रियतेवर मोठे प्रश्नचिन्ह उभे केले आहे. नागरिकांनी तात्काळ ठोस उपाययोजना करून जबाबदारांवर कारवाई करण्याची मागणी केली आहे.