चणेरा येथे भक्तिमय वातावरणात श्री सत्यनारायण महापूजा उत्साहात संपन्न…..

प्रतिनिधी – सत्यप्रसाद आडाव चणेरा

रोहा तालुक्यातील चणेरा नाका येथे विक्रम मिनिडोर चालक–मालक संघटना, चणेरा–रोहा यांच्या वतीने सालाबादप्रमाणे यंदाही गुरुवार, दिनांक १६ एप्रिल रोजी श्री सत्यनारायणाची महापूजा मोठ्या भक्तिभावाने आयोजित करण्यात आली. या धार्मिक सोहळ्याला परिसरातील भाविकांनी उत्स्फूर्त प्रतिसाद देत तीर्थप्रसादाचा लाभ घेतला.
या पूजेचा मान श्री व सौ. प्रचीती प्रदीप भोई या दांपत्यांना मिळाला. त्यांनी विधिवत पूजा करून उपस्थित भाविकांसाठी मंगलमय वातावरण निर्माण केले. याच निमित्ताने विठ्ठल रखुमाई प्रासादिक भजन मंडळ, चणेरा यांचा सुरेल भजनाचा कार्यक्रमही आयोजित करण्यात आला होता. या भजन कार्यक्रमामुळे संपूर्ण परिसर भक्तिरसात रंगून गेला आणि वातावरण अधिकच पवित्र व प्रसन्न झाले.
कार्यक्रमाच्या यशस्वी आयोजनासाठी संघटनेचे अध्यक्ष, उपाध्यक्ष, सल्लागार, खजिनदार तसेच सर्व सदस्यांनी परिश्रम घेतले. त्यांच्या समन्वय आणि नियोजनामुळे हा धार्मिक कार्यक्रम अत्यंत सुरळीत व यशस्वीरीत्या पार पडला. या उपक्रमामुळे सामाजिक ऐक्य आणि धार्मिक भावना अधिक दृढ झाल्याचे समाधान उपस्थितांनी व्यक्त केले.