कंत्राटी ते कायम: जनरल मजदूर सभेच्या लढ्याला मोठं यश, बेक केमिकल्समध्ये १८ कामगारांना कायम दर्जा
प्रतिनिधी – सत्यप्रसाद आडाव चणेरा
कंत्राटी कामगारांच्या हक्कांसाठी सातत्याने लढा देणाऱ्या जनरल मजदूर सभेच्या प्रयत्नांना अखेर यश मिळाले असून बेक केमिकल्स कंपनीतील १८ कंत्राटी कामगारांना कायम कामगारांचा दर्जा देण्याचा महत्त्वपूर्ण निर्णय व्यवस्थापनाने घेतला आहे. या निर्णयामुळे कामगारांमध्ये आनंदाचे वातावरण निर्माण झाले आहे. जनरल मजदूर सभा आणि कंपनी व्यवस्थापन यांच्यात झालेल्या करारानुसार या कामगारांना टप्प्याटप्प्याने कायम सेवेत सामावून घेण्याची प्रक्रिया सुरू आहे. याअंतर्गत यापूर्वी ६ कामगारांना कंपनीच्या थेट रोलवर कायम करण्यात आले होते. आता नुकतेच आणखी ६ कामगारांना कायम दर्जा देण्यात आला असून त्यांना अधिकृत नियुक्तीपत्रांचे वितरण करण्यात आले.
नियुक्तीपत्र वितरण सोहळा उत्साहात पार पडला. जनरल मजदूर सभेचे सरचिटणीस संजय वढावकर, अध्यक्षा संज्योत वढावकर आणि उपाध्यक्ष शामकांत जोशी यांच्या हस्ते कामगारांना पत्रक प्रदान करण्यात आली. कंपनीकडून साईट हेड/डायरेक्टर समीर पवार, सिनिअर मॅनेजर (एचआर) गजानन बामणे, असिस्टंट मॅनेजर शैलेश निंबरे उपस्थित होते. तसेच युनियनचे सचिव जगदीश उपाध्ये, खजिनदार प्रशांत शेट्ये, रायगड संपर्क प्रमुख सुहास खरीवले यांचीही उपस्थिती होती.
प्रसंगी बेक कमिटीचे अध्यक्ष संजय शेळके, राजेश बानुगडे, विजय जाधव, सतीस चावरेकर, संदीप रटाटे तसेच मोठ्या संख्येने कामगार उपस्थित होते. या निर्णयामुळे कंत्राटी कामगारांमध्ये समाधान आणि सुरक्षिततेची भावना निर्माण झाली असून जनरल मजदूर सभेच्या कार्याचे सर्व स्तरांतून कौतुक होत आहे. भविष्यात उर्वरित कामगारांनाही कायम करण्याची प्रक्रिया लवकरच पूर्ण होईल, अशी अपेक्षा व्यक्त केली जात आहे.