‘‘श्वेतराज’मधून उमलली कवयित्री संध्या दिवकर यांची साहित्यिक प्रतिभा
ना. आदिती तटकरे यांच्या हस्ते काव्यसंग्रहाचे शानदार प्रकाशन; “असेच भरभरून लिहा, पुढील काळात तुमची अनेक पुस्तके वाचायला मिळोत”
रोहा प्रतिनिधी (संतोष सातपुते)
शिक्षिका ते कवयित्री हा संध्या दिवकर यांचा प्रवास सुरेल आणि प्रेरणादायी आहे. *‘बोला पुढारी’*सारख्या मिश्कील कवितेतून त्यांची प्रतिभा दिसून येते. त्यांच्या कविता मार्मिक असून विडंबनात्मक लेखनही सुंदर आहे. “असेच भरभरून लिहा, पुढील काळात तुमची अनेक पुस्तके आम्हाला वाचायला मिळोत,” अशा शुभेच्छा ना. आदिती तटकरे यांनी दिल्या.
रोहा येथील ज्येष्ठ नागरिक सभागृहात कोकण मराठी साहित्य परिषद, रोहा शाखेच्या वतीने कवयित्री संध्या विजय दिवकर यांच्या ‘श्वेतराज’ या पहिल्या काव्यसंग्रहाचा प्रकाशन सोहळा झाला. या काव्यसंग्रहाचे प्रकाशन ना. आदिती तटकरे यांच्या हस्ते करण्यात आले.
यावेळी नगराध्यक्षा वनश्री शेडगे, ज्येष्ठ साहित्यिक एल. बी. पाटील, कोमसाप जिल्हाध्यक्ष संजय गुंजाळ, गडदुर्ग अभ्यासक सुखद राणे, गझलकार ज्योत्स्ना राजपूत, सभापती रवींद्र चाळके यांच्यासह साहित्य क्षेत्रातील मान्यवर उपस्थित होते.
संध्या दिवकर या रोहा नगरपरिषदेच्या कै. प्रफुल्लशेठ बारटके मंगलवाडी शाळा क्रमांक १० येथे प्राथमिक शिक्षिका म्हणून कार्यरत असून, कोमसाप रोहा शाखेच्या अध्यक्षा आहेत. काव्यलेखनासोबतच रांगोळी, चित्रकला, गायन, बाहुली नाट्य, आगरी कविता, गझल लेखन आदी विविध कला त्या जोपासत आहेत.
यावेळी नगराध्यक्षा वनश्री शेडगे यांनी संध्या दिवकर या उपक्रमशील शिक्षिका असून उत्तम कवयित्री असल्याचे सांगत त्यांच्या साहित्यिक वाटचालीचे कौतुक केले. साहित्यविषयक उपक्रमांसाठी पालिकेत हक्काची जागा उपलब्ध करून देण्याची ग्वाही त्यांनी दिली.
*‘श्वेतराज’*मधील निवडक कवितांचे वाचन करण्यात आले. कार्यक्रमाचे प्रास्ताविक विजय दिवकर, पुस्तक परिचय सुखद राणे, सूत्रसंचालन हेमंत बारटक्के, तर आभार भारत चौधरी यांनी मानले. कार्यक्रमाच्या यशस्वीतेसाठी साहित्यप्रेमी व आयोजकांनी विशेष परिश्रम घेतले.
