न्हावे येथे ‘पंढरपूर पायी दिंडी’चा मनोहारी देखावा; भक्तिमय वातावरणात गणरायाची आराधना

प्रतिनिधी / सत्यप्रसाद  आडाव चणेरा

दि. २२ सप्टें. कोळी समाज अध्यक्ष न्हावे मनोहर डबीर यांच्या निवासस्थानी यंदाच्या गणेशोत्सवानिमित्त ‘पंढरपूर पायी दिंडी’चा आकर्षक देखावा साकारण्यात आला आहे. पारंपरिक वारकरी संस्कृती, विठ्ठल भक्ती आणि गणेशभक्ती यांचा सुंदर संगम या देखाव्यातून पाहायला मिळत आहे.
गणेशमूर्तीसमोर साकारलेल्या या देखाव्यात पंढरपूरच्या वारीचे दर्शन घडविण्यात आले असून, वारकरी, टाळ-मृदंग, दिंडीतील भक्तगण आणि विविध धार्मिक प्रसंगांच्या प्रतिकृतींमधून महाराष्ट्राच्या समृद्ध भक्तीपरंपरेचे दर्शन घडते. देखाव्याची सजावट आकर्षक विद्युत रोषणाई, फुलांची आरास आणि विविध रंगसंगतीने करण्यात आली आहे.
विशेष म्हणजे, पंढरपूरच्या वारीची परंपरा आणि वारकऱ्यांची विठ्ठलावरील श्रद्धा सर्वसामान्यांपर्यंत पोहोचावी, तसेच नव्या पिढीला महाराष्ट्राच्या सांस्कृतिक आणि आध्यात्मिक परंपरेची ओळख व्हावी, या उद्देशाने हा देखावा साकारण्यात आला आहे.
देखाव्यातील वारकऱ्यांच्या प्रतिकृती, दिंडीचे वातावरण आणि मध्यभागी विराजमान असलेले गणराय यामुळे संपूर्ण परिसराला भक्तिमय स्वरूप प्राप्त झाले आहे. देखावा पाहण्यासाठी परिसरातील नागरिक, भाविक आणि गणेशभक्त आवर्जून भेट देत असून त्यांच्याकडून या संकल्पनेचे कौतुक केले जात आहे.
मनोहर डबीर यांच्या पुढाकारातून साकारण्यात आलेल्या या देखाव्यामुळे न्हावे गावातील गणेशोत्सवाला धार्मिकतेसोबतच सांस्कृतिक आणि सामाजिक संदेशाची जोड मिळाली आहे. महाराष्ट्राच्या संतपरंपरेचा आणि वारकरी संप्रदायाचा वारसा जपणारा हा देखावा यंदाच्या गणेशोत्सवातील विशेष आकर्षण ठरत आहे.