समाजसेवेच्या कार्याचा शिर्डीत गौरव; डॉ. फरीद चिमावकर यांना राज्यस्तरीय ‘महाराष्ट्र गौरव’

सामाजिक, वैद्यकीय व ग्राहक सेवा क्षेत्रातील उल्लेखनीय योगदानाची राज्यस्तरावर दखल; रायगडच्या शिरपेचात मानाचा तुरा

प्रतिनिधी (संतोष सातपुते)

रोहा तालुक्यात सामाजिक, वैद्यकीय आणि ग्राहक सेवा क्षेत्रात सातत्याने उल्लेखनीय कार्य करणारे डॉ. फरीद चिमावकर यांच्या समाजोपयोगी कार्याची राज्यस्तरावर दखल घेण्यात आली आहे. शिर्डी येथे आयोजित करण्यात आलेल्या विशेष पुरस्कार सोहळ्यात **‘बी द चेंज फाउंडेशन’**च्या वतीने डॉ. चिमावकर यांना मानाचा राज्यस्तरीय ‘महाराष्ट्र गौरव’ पुरस्कार प्रदान करण्यात आला. त्यांच्या या सन्मानामुळे रोहा तालुक्यासह रायगड जिल्ह्याच्या शिरपेचात आणखी एक मानाचा तुरा रोवला गेला आहे.
शिर्डीच्या पावन भूमीत झालेल्या या गौरव सोहळ्यात मराठी चित्रपटसृष्टीतील सुप्रसिद्ध अभिनेत्री निवेदिता पगार, भारतीय सैन्यातील सेवानिवृत्त सुभेदार मेजर उत्तमराव मोहोड, अरुण भंडारे यांच्यासह विविध क्षेत्रांतील मान्यवरांच्या हस्ते डॉ. फरीद चिमावकर यांचा सन्मान करण्यात आला.
डॉ. चिमावकर यांनी गेल्या अनेक वर्षांपासून केवळ आपल्या व्यावसायिक क्षेत्रापुरते मर्यादित न राहता समाजहिताला केंद्रस्थानी ठेवून विविध उपक्रम राबविले आहेत. वैद्यकीय सेवा, ग्राहकांच्या समस्या सोडविण्यासाठी केलेले प्रयत्न, सामाजिक बांधिलकी आणि विविध समाजोपयोगी उपक्रमांमधील सक्रिय सहभाग या कार्याची दखल घेत त्यांना हा प्रतिष्ठेचा पुरस्कार प्रदान करण्यात आला.
सेवेची नाळ समाजाशी जोडली; राज्यस्तरावर उमटला कार्याचा ठसा
रोहा तालुक्यात कार्यरत असलेल्या डॉ. चिमावकर यांनी आपल्या कार्यातून सर्वसामान्यांशी जिव्हाळ्याचे नाते निर्माण केले आहे. गरजूंसाठी वैद्यकीय मदत असो, ग्राहकांच्या अडचणी असोत किंवा सामाजिक उपक्रमांमध्ये योगदान देण्याची वेळ असो, प्रत्येक ठिकाणी त्यांनी आपली सामाजिक बांधिलकी जपली. त्यांच्या या कार्याचा गौरव शिर्डीत राज्यस्तरीय पुरस्काराने झाल्याने रोहेकरांच्या शिरपेचातही अभिमानाचा तुरा रोवला गेला आहे.
या पुरस्कार सोहळ्यात महाराष्ट्रातील विविध जिल्ह्यांतून उल्लेखनीय कार्य करणाऱ्या मान्यवरांची निवड करून त्यांचा गौरव करण्यात आला. शिक्षण क्षेत्रात योगदान देणाऱ्या शिक्षकांचा तसेच सौंदर्यकला क्षेत्रात उल्लेखनीय कार्य करणाऱ्या महिलांचाही यावेळी सन्मान करण्यात आला. त्यामुळे सामाजिक, शैक्षणिक, वैद्यकीय आणि कला क्षेत्रातील कर्तृत्वाचा संगम घडविणारा हा सोहळा विशेष ठरला.
‘हा सन्मान नव्या जबाबदारीची जाणीव करून देणारा’
राज्यस्तरीय ‘महाराष्ट्र गौरव’ पुरस्कार मिळाल्याबद्दल आनंद व्यक्त करताना डॉ. फरीद चिमावकर यांनी हा सन्मान आपल्या आजवरच्या कार्याची केवळ पोचपावती नसून समाजासाठी अधिक जबाबदारीने आणि जोमाने कार्य करण्याची प्रेरणा देणारा गौरव असल्याचे सांगितले. भविष्यातही समाजाच्या हितासाठी विविध माध्यमातून कार्यरत राहण्याचा निर्धार त्यांनी व्यक्त केला.
डॉ. फरीद चिमावकर यांच्या या राज्यस्तरीय गौरवाबद्दल विविध क्षेत्रांतील मान्यवर, सामाजिक कार्यकर्ते, नागरिक, मित्रपरिवार आणि शुभेच्छुकांकडून अभिनंदनाचा वर्षाव होत आहे. रोह्यातील सामाजिक कार्याची पताका शिर्डीपर्यंत आणि राज्याच्या पटलावर पोहोचविणारा हा सन्मान रायगड जिल्ह्यासाठी निश्चितच अभिमानाची बाब ठरली आहे.