अनुसूचित जातीच्या शेतकऱ्यांच्या खोती जमिनींच्या मोजणीत गंभीर अनियमिततेचा आरोप; चौकशीची मागणी

प्रतिनिधी /रवींद्र लाड

रायगड जिल्ह्यातील म्हसळा तालुक्यातील केल्टे गावातील अनुसूचित जातीच्या शेतकऱ्यांच्या खोती जमिनींच्या मोजणी व हद्द कायम करण्याच्या प्रक्रियेत गंभीर अनियमितता झाल्याचा आरोप करण्यात आला आहे. या संदर्भात केल्टे ग्रामस्थानी गृहमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, महसूल मंत्री चंद्रशेखर बावनकुळे, फलोउत्पादन मंत्री भरत शेठ गोगावले, महिला व बाल विकास मंत्री, स्थानिक आमदार आदिती तटकरे, स्थानिक खासदार सुनील तटकरे, महसूल सचिव, जिल्हाधिकारी रायगड , पोलीस अधीक्षक रायगड आदिना निवेदन सादर करून संपूर्ण प्रकरणाची स्वतंत्र चौकशी करून दोषींवर कठोर कायदेशीर कारवाई करण्याची मागणी केली आहे.

निवेदनात म्हटले आहे की, खोती जमिनींच्या मोजणी प्रक्रियेदरम्यान अनेक शेतकऱ्यांना कायद्यानुसार पूर्वसूचना (नोटीस) देण्यात आली नाही. काही प्रकरणांमध्ये प्रत्यक्ष मोजणी पूर्ण झाल्यानंतर नोटीस बजावण्यात आल्याचा आरोप करण्यात आला आहे. तसेच संबंधित अभिलेखांमध्ये चुकीचे मोबाईल क्रमांक नोंदविण्यात आल्यामुळे अनेक शेतकऱ्यांना कार्यवाहीची माहितीच मिळाली नसल्याचे निवेदनात नमूद करण्यात आले आहे.

याशिवाय काही शेतकऱ्यांच्या अनुपस्थितीत, त्यांना कोणतीही माहिती किंवा संधी न देता जमिनींची हद्द कायम करण्यात आल्याचा आरोपही करण्यात आला आहे. हद्द कायम करण्याच्या आदेशांवरील स्वाक्षऱ्या, शिक्के तसेच आवश्यक प्रमाणीकरणाबाबतही गंभीर शंका उपस्थित करण्यात आली असून, संबंधित आदेशांच्या प्रती निवेदनासोबत जोडण्यात आल्याचे सांगण्यात आले आहे.

संपूर्ण प्रक्रिया पारदर्शक पद्धतीने न राबविता काही व्यक्तींना अनुचित लाभ मिळेल अशा प्रकारे कार्यवाही करण्यात आल्याचा संशय व्यक्त करण्यात आला आहे. त्यामुळे या प्रकरणातील सर्व नोंदी, आदेश, नोटिसा आणि अभिलेखांची स्वतंत्र व निष्पक्ष चौकशी करून सत्य परिस्थिती समोर आणावी, अशी मागणी करण्यात आली आहे.

शेतकऱ्यांनी जिल्हाधिकाऱ्यांना दिलेल्या निवेदनात संबंधित जमिनींचे संरक्षण करण्यासाठी तातडीने आवश्यक उपाययोजना करण्यात याव्यात तसेच चौकशीत दोषी आढळणाऱ्या अधिकारी किंवा संबंधित व्यक्तींवर कायद्यानुसार कठोर कारवाई करण्यात यावी, अशीही मागणी केली आहे.

दरम्यान, या निवेदनामुळे संबंधित परिसरातील अनुसूचित जातीच्या शेतकऱ्यांमध्ये चिंतेचे वातावरण निर्माण झाले असून, प्रशासन या तक्रारीची कोणती दखल घेते याकडे सर्वांचे लक्ष लागले आहे.