रोह्यात उत्साहाचे वातावरण; आज रात्री ८ वाजता ‘मोहिनी’ मालिकेची टीम नागरिकांशी संवाद साधणार
रोहा : रोहा शहरासाठी अभिमानाची बाब म्हणजे येथील कु. अनघा ठाकूर हिने मराठी मनोरंजन क्षेत्रात मोठी झेप घेत ‘मोहिनी’ या मालिकेत मुख्य भूमिका साकारली आहे. आपल्या मेहनत, जिद्द आणि अभिनय कौशल्याच्या जोरावर अनघाने छोट्या पडद्यावर आपली ओळख निर्माण केली आहे.
या निमित्ताने ‘मोहिनी’ मालिकेची संपूर्ण टीम आज रात्री ८ वाजता रोह्यातील भाऊच्या धक्क्यावर येणार आहे. या वेळी कलाकार प्रेक्षकांशी संवाद साधणार असून, चाहत्यांना त्यांना प्रत्यक्ष भेटण्याची संधी मिळणार आहे. त्यामुळे शहरात उत्साहाचे वातावरण निर्माण झाले आहे.
‘मोहिनी’ ही मालिका प्रेम, नातेसंबंध आणि भावनिक कथानकावर आधारित असून, प्रेक्षकांना आकर्षित करणाऱ्या फिल्मी शैलीत सादर केली जाणार आहे. ही मालिका उद्यापासून दररोज संध्याकाळी ७.३० वाजता Colors Marathi या लोकप्रिय वाहिनीवर प्रसारित होणार आहे.
अनघा ठाकूरच्या या यशामुळे रोहा शहराचा मान उंचावला असून, तिच्यावर सर्व स्तरातून कौतुकाचा वर्षाव होत आहे. स्थानिक नागरिकांनी मोठ्या संख्येने उपस्थित राहून तिचे स्वागत करण्याचे आवाहन करण्यात आले आहे.
रोह्यासारख्या शहरातून मनोरंजन क्षेत्रात यश मिळवणे हे प्रेरणादायी असून, अनघा ठाकूर ही तरुणांसाठी एक आदर्श ठरत आहे.