रोहा अष्टमी नगर परिषदेच्या शालेय इमारतीसाठी ५ कोटींचा निधी; आमदार अनिकेत तटकरे यांच्याकडून निधीपत्राचे वितरण

रोहा प्रतिनिधी : संतोष सातपुते

रायगड जिल्ह्यातील रोहा तालुक्यातील रोहा अष्टमी नगर परिषदेच्या डॉ. चिंतामणराव देशमुख शाळेच्या सर्वांगीण विकासासाठी ५ कोटी रुपयांचा निधी मंजूर करण्यात आला असून, या निधीचे पत्र आमदार अनिकेत तटकरे यांनी प्रदान केले. या निधीतून शाळेच्या नवीन इमारतीचे बांधकाम व विविध विकासकामे हाती घेण्यात येणार असून, शाळेचा आधुनिक व सर्व सुविधांनी सुसज्ज असा कायापालट होणार आहे.
रोहा अष्टमी नगर परिषदेचे शिक्षण, क्रीडा व युवक कल्याण सभापती रवींद्र चाळके यांनी शाळेच्या विकासासाठी सातत्याने पाठपुरावा केला होता. त्यांच्या प्रयत्नांना अखेर यश मिळाल्याने हा महत्त्वाचा निधी मंजूर झाला आहे.
दिनांक २ ऑगस्ट रोजी खासदार सुनील तटकरे तसेच महाराष्ट्र राज्याच्या महिला व बालविकास मंत्री कु. अदिती तटकरे यांनी डॉ. चिंतामणराव देशमुख शाळेला भेट देऊन पाहणी केली. यावेळी शाळेचा दर्जा अधिक उंचावण्यासाठी अत्याधुनिक सुविधा उपलब्ध करून देण्याबाबत संबंधित अधिकाऱ्यांना आवश्यक सूचना देण्यात आल्या. तसेच, शाळेच्या विकासासाठी आवश्यकतेनुसार अतिरिक्त निधीचीही कमतरता भासू दिली जाणार नाही, असे आश्वासन त्यांनी शाळा प्रशासनाला दिले.
यावेळी शिक्षण, क्रीडा व युवक कल्याण सभापती रवींद्र चाळके यांनी खासदार सुनील तटकरे, मंत्री अदिती तटकरे, आमदार अनिकेत तटकरे तसेच नगराध्यक्षा वनश्री शेडगे यांचे मनःपूर्वक आभार मानले. शाळेच्या विकासासाठी सर्व स्तरातून मिळालेल्या सहकार्यामुळे विद्यार्थ्यांना आधुनिक, दर्जेदार व गुणवत्तापूर्ण शैक्षणिक वातावरण उपलब्ध होणार असल्याची भावना त्यांनी व्यक्त केली.