“विठ्ठलनामाच्या गजरात न्हावे ग्रामस्थांची भक्तिमय दिंडी; टाळ-मृदुंगाच्या तालावर विठ्ठल-रुक्मिणी मंदिरात उत्साहपूर्ण आगमन”
प्रतिनिधी – सत्यप्रसाद आडाव चणेरा
आषाढी एकादशीच्या पावन पर्वानिमित्त न्हावे गावात भक्ती, श्रद्धा आणि उत्साहाने ओतप्रोत भरलेला वारकरी सोहळा अनुभवायला मिळाला. ह.भ.प. अजय साळावकर यांच्या येथून निघालेल्या दिंडीने श्रीराम मंदिर, सोनखार येथून भक्तिमय वातावरणात प्रस्थान केले. या दिंडीत रा. जि. प. शाळा, न्हावे येथील शिक्षक, सर्व विद्यार्थी तसेच ग्रामस्थ मोठ्या संख्येने सहभागी झाले होते.
दिंडी पुढे जात असताना ठिकाणआळी परिसरात वारकऱ्यांनी टाळ-मृदुंगाच्या गजरात, अभंग-भजनांच्या सुरावटीवर नाच-गाणी, फुगड्या खेळत भक्तिरसाचा अनोखा आविष्कार साकारला. विठ्ठलनामाच्या अखंड गजराने संपूर्ण परिसर भक्तिमय वातावरणाने भारावून गेला. “ज्ञानोबा-तुकाराम”, “पुंडलिक वरदा हरी विठ्ठल” अशा जयघोषांनी गाव दुमदुमून गेले.
यानंतर दिंडी उत्साहाच्या वातावरणात मराठआळी येथील श्री विठ्ठल-रुक्मिणी मंदिरात दाखल झाली. मंदिर परिसरात वारकऱ्यांचे जल्लोषात स्वागत करण्यात आले. विठ्ठलाच्या चरणी सर्वांनी सामूहिक प्रार्थना करून सुख-समृद्धी, शांतता आणि सर्वांच्या कल्याणाची प्रार्थना केली.
श्री विठ्ठलाच्या गजरात, मृदुंगाच्या निनादात आणि टाळांच्या तालावर तल्लीन होऊन पुढे सरकणारी वारकऱ्यांची पावले म्हणजे भक्ती, श्रद्धा आणि समर्पणाचा अथांग सोहळाच असल्याचे चित्र यावेळी पाहायला मिळाले. हातात वैष्णवांच्या पताका, मुखी “विठ्ठल विठ्ठल”चा अखंड नामघोष आणि मनात माऊलीप्रती अपार भक्तिभाव घेऊन निघालेल्या वारकऱ्यांनी वारीच्या परंपरेचे जिवंत दर्शन घडविले.
वारी ही केवळ धार्मिक परंपरा नसून प्रेम, समता, बंधुभाव आणि मानवतेचा संदेश देणारी संस्कृती आहे. भेदाभेद विसरून सर्वांना एकत्र आणणाऱ्या या वारकरी परंपरेत सहभागी होत ग्रामस्थांनी सामाजिक ऐक्याचेही दर्शन घडविले. विठ्ठल-रुक्मिणीच्या दर्शनाने मनातील चिंता दूर होऊन भक्तीचा नवा प्रकाश प्रत्येकाच्या जीवनात उजळतो, अशी भावना यावेळी उपस्थित वारकरी आणि ग्रामस्थांनी व्यक्त केली.
आषाढी एकादशी निमित्त आयोजित करण्यात आलेल्या या दिंडी सोहळ्याने संपूर्ण न्हावे गाव विठ्ठलमय झाले असून, भक्ती, उत्साह आणि वारकरी संस्कृतीचा अविस्मरणीय संगम अनुभवण्याची संधी ग्रामस्थांना लाभली.
