जागतिक बुद्धिबळ दिनी रोहा तालुका चेस असोसिएशनची स्थापना; अध्यक्षपदी प्रमोदशेठ म्हसकर

रोहा प्रतिनिधी : संतोष सातपुते

रोहा तालुक्यात बुद्धिबळ खेळाचा प्रसार, नवोदित खेळाडूंना प्रोत्साहन आणि दर्जेदार प्रशिक्षणाची सुविधा उपलब्ध करून देण्याच्या उद्देशाने जागतिक बुद्धिबळ दिनाचे औचित्य साधून रोहा तालुका चेस असोसिएशन (आरटीसीए) ची स्थापना करण्यात आली. संस्थेच्या अध्यक्षपदी सामाजिक व क्रीडा क्षेत्रातील कार्यकर्ते मा. श्री. प्रमोदशेठ म्हसकर यांची सर्वानुमते निवड करण्यात आली.
नूतन कार्यकारिणीत कार्याध्यक्षपदी संकेत खोत, उपाध्यक्षपदी अमर सलागरे, सचिवपदी विक्रांत जाना, सहसचिवपदी विवेक कांबळे, खजिनदारपदी महेश बामुगडे आणि सहखजिनदारपदी योगेश भगत यांची निवड करण्यात आली. कार्यकारिणी सदस्य म्हणून आभूषण मिठागरी, विवेक कानडे, ओमकार पवार, अनिकेत पाशिलकर, प्रशांत देशमुख, सुधीर जंगम, रविंद्र कान्हेकर आणि रोहन चव्हाण यांचा समावेश करण्यात आला आहे.
दरम्यान, नवनिर्वाचित अध्यक्ष प्रमोदशेठ म्हसकर यांच्या वाढदिवसानिमित्त त्यांच्या पुरस्कारातून दि. ९ ऑगस्ट २०२६ रोजी रोहा येथे भव्य बुद्धिबळ स्पर्धेचे आयोजन करण्यात आले आहे. या स्पर्धेत २०० खेळाडूंना सहभागी होता येणार असून खुल्या गटासाठी ₹१०० नोंदणी शुल्क ठेवण्यात आले आहे. तर १६ वर्षांखालील खेळाडूंना प्रवेश पूर्णपणे विनामूल्य असणार आहे.
याचबरोबर रोहा तालुक्यातील बाल व युवा बुद्धिबळपटूंना नियमित प्रशिक्षण, योग्य मार्गदर्शन आणि स्पर्धात्मक व्यासपीठ उपलब्ध करून देण्यासाठी ‘पी. एम. चेस अकॅडमी’ सुरू करण्यात येणार आहे. प्रमोदशेठ म्हसकर यांच्या माध्यमातून सुरू होणाऱ्या या अकॅडमीतून जिल्हा, राज्य आणि राष्ट्रीय स्तरावरील गुणवंत बुद्धिबळपटू घडविण्याचा संकल्प करण्यात आला आहे.
सामाजिक, शैक्षणिक आणि क्रीडा क्षेत्राला सातत्याने प्रोत्साहन देणाऱ्या प्रमोदशेठ म्हसकर यांच्या नेतृत्वाखाली रोहा तालुका चेस असोसिएशनच्या माध्यमातून तालुक्यात बुद्धिबळाची चळवळ अधिक व्यापक करण्याचा निर्धार नूतन कार्यकारिणीने व्यक्त केला आहे.
जागतिक बुद्धिबळ दिनी स्थापन झालेली नवी कार्यकारिणी, ९ ऑगस्ट रोजी होणारी भव्य बुद्धिबळ स्पर्धा आणि ‘पी. एम. चेस अकॅडमी’च्या स्थापनेमुळे रोहा तालुक्यात बुद्धिबळ खेळाला नवी दिशा मिळणार असल्याची माहिती असोसिएशनचे उपाध्यक्ष अमर सलागरे यांनी दिली.