पत्रकारांना धमकी प्रकरणी रोहा प्रेस क्लबचे निवेदन; खासदार संजय दिना पाटील यांचा निषेध
रोहा प्रतिनिधी (संतोष सातपुते)
पत्रकारांना शिवीगाळ व जीवे मारण्याची धमकी दिल्याचा आरोप असलेल्या खासदार संजय दिना पाटील यांच्या वक्तव्याचा निषेध करत रोहा प्रेस क्लबच्या वतीने मराठी पत्रकार परिषद अध्यक्ष मिलिंद अष्टीवकर यांच्या मार्गदर्शनाखाली रोहा पोलीस ठाण्यात निवेदन देण्यात आले. पत्रकारांवरील अशा प्रकारच्या धमक्या लोकशाही आणि प्रसारमाध्यमांच्या स्वातंत्र्यावर आघात करणाऱ्या असून संबंधितांवर तात्काळ कारवाई करण्याची मागणी यावेळी करण्यात आली.
अखिल भारतीय मराठी पत्रकार परिषद व रायगड प्रेस क्लब यांच्या आवाहनानुसार शुक्रवारी सायंकाळी रोहा प्रेस क्लबच्या पदाधिकाऱ्यांनी रोहा पोलीस प्रशासनाला निवेदन सादर केले. पत्रकारांशी बोलताना वापरण्यात आलेली भाषा, शिवीगाळ तसेच धमकीवजा वक्तव्ये ही अत्यंत निषेधार्ह असल्याचे निवेदनात नमूद करण्यात आले आहे.
पत्रकार हे लोकशाहीचा चौथा स्तंभ असून समाजातील विविध प्रश्न जनतेसमोर मांडण्याचे काम करत असतात. अशा परिस्थितीत पत्रकारांना धमकावणे, त्यांच्या कामात अडथळे निर्माण करणे किंवा भीतीचे वातावरण तयार करणे ही गंभीर बाब असल्याचे रोहा प्रेस क्लबच्या वतीने स्पष्ट करण्यात आले.
यावेळी आजच्या राजकारणात सभ्यता आणि सुसंस्कृतपणा जपला जाणे आवश्यक असल्याचे मत व्यक्त करण्यात आले. पत्रकारांबाबत अवमानकारक भाषा वापरणाऱ्या व धमकी देणाऱ्या लोकप्रतिनिधींवर कठोर कारवाई व्हावी, अशी मागणी पदाधिकाऱ्यांनी केली.
रोहा प्रेस क्लबचे अध्यक्ष श्याम लोखंडे, रायगड प्रेस क्लबचे राजेंद्र जाधव, कार्याध्यक्ष सुहास खरीवले, सचिव रविंद्र कान्हेकर, उपाध्यक्ष जितेंद्र जाधव, अंजुम शेट्ये, मुख्य संघटक उद्धव आव्हाड , सहसचिव दीपक भगत, प्रसिद्धी प्रमुख नंदकुमार मरवडे, संघटक संतोष सातपुते, सागर जैन, संदीप सरफळे, महेंद्र मोरे, राकेश मोरे, भिवा पवार यांच्यासह क्लबचे पदाधिकारी व पत्रकार मोठ्या संख्येने उपस्थित होते.
निवेदनाद्वारे पत्रकारांना धमकी दिल्याप्रकरणी गुन्हा दाखल करणे, संबंधित वक्तव्याची चौकशी करून दोषींवर कठोर कारवाई करणे तसेच पत्रकारांच्या सुरक्षिततेसाठी आवश्यक उपाययोजना करण्याची मागणी करण्यात आली. पत्रकारांच्या सन्मान व अभिव्यक्ती स्वातंत्र्याच्या रक्षणासाठी हा लढा सुरूच राहील, असा निर्धारही यावेळी व्यक्त करण्यात आला.
