रोहा रेल्वे स्थानकाची दमदार झेप; उत्पन्नात २१% वाढ, प्रवाशांचा वाढता ओघ!

रोहा प्रतिनिधी (संतोष सातपुते)

कोकण रेल्वे आणि मध्य रेल्वेला जोडणारे महत्त्वाचे जंक्शन ठरलेल्या रोहा रेल्वे स्थानकाने यंदा प्रगतीची नवी उंची गाठली आहे. स्थानकाच्या उत्पन्नात तब्बल २१ टक्क्यांची वाढ नोंदवली गेली असून, २०२५-२६ या आर्थिक वर्षात उत्पन्नाने ₹३.६२ कोटींचा टप्पा पार केला आहे. या वाढीमुळे रोहा स्थानक पुन्हा एकदा चर्चेत आले आहे.
मिळालेल्या आकडेवारीनुसार, २०२४-२५ मध्ये ₹२.९९ कोटी असलेले उत्पन्न २०२५-२६ मध्ये वाढून ₹३.६२ कोटींवर पोहोचले आहे. ही वाढ स्थानकाच्या वाढत्या वापराची आणि सुधारलेल्या सेवांची साक्ष देणारी ठरली आहे.
तिकीट विक्रीतही विक्रमी कामगिरी
आरक्षित तिकीट (PRS) विक्रीत सर्वाधिक झेप पाहायला मिळाली. मागील वर्षी ₹६७.२४ लाख असलेली विक्री यंदा थेट ₹९९.२७ लाखांपर्यंत पोहोचली, म्हणजेच तब्बल ४७.६ टक्के वाढ!
तर जनरल तिकीट (UTS) विक्रीतही वाढ होत ₹२.३२ कोटींवरून ₹२.६३ कोटींवर गेली आहे.
प्रवासी संख्येतही वाढ
रोहा स्थानकातून प्रवास करणाऱ्या प्रवाशांची संख्या सातत्याने वाढताना दिसत आहे.
जाणारे प्रवासी: ८.६४ लाख (१०.२% वाढ)
येणारे प्रवासी: ७.७० लाख (४.७% वाढ)
ही आकडेवारी स्थानकावरील वाढती विश्वासार्हता आणि सुविधांमधील सुधारणा स्पष्टपणे दर्शवते.
प्रवासी समितीचा विश्वास
रोहा रेल्वे प्रवासी समितीचे अध्यक्ष फैसल अधिकारी यांनी सांगितले की,
“स्थानकावर झालेल्या विकासकामांमुळे आणि वाढलेल्या सोयी-सुविधांमुळे प्रवाशांचा प्रतिसाद मोठ्या प्रमाणात वाढला आहे. भविष्यात अधिक लांब पल्ल्याच्या गाड्यांना थांबा मिळण्याची शक्यता यामुळे निर्माण झाली आहे.”
तसेच सल्लागार गणेश मासक यांनीही समाधान व्यक्त करत, प्रवाशांच्या सोयींसाठी पुढील काळात अधिक प्रयत्न सुरू ठेवणार असल्याचे स्पष्ट केले.
भविष्यासाठी सकारात्मक संकेत
रोहा स्थानकाची ही भरारी केवळ आकडेवारीपुरती मर्यादित नसून, कोकणातील रेल्वे विकासासाठी एक सकारात्मक संकेत मानली जात आहे. वाढते उत्पन्न, वाढती प्रवासी संख्या आणि सुधारलेल्या सेवा यामुळे रोहा स्थानक भविष्यात आणखी मोठी झेप घेण्याच्या तयारीत आहे.