धाटाव औद्योगिक क्षेत्रात ‘योगा’ची नवी ऊर्जा : DMCC कंपनीत आरोग्यदायी उपक्रम उत्साहात
रोहा प्रतिनिधी : संतोष सातपुते
धाटाव औद्योगिक क्षेत्रात सध्या कामाच्या धकाधकीत कामगारांच्या आरोग्याचा प्रश्न गंभीर होत असताना, DMCC केमिकल कंपनीने एक सकारात्मक पाऊल उचलत योगा, मेडिटेशन आणि फिटनेस प्रशिक्षण शिबिराचे आयोजन केले. २८ मार्च रोजी कंपनीच्या परिसरात पार पडलेला हा उपक्रम उत्साहात आणि प्रेरणादायी वातावरणात संपन्न झाला.
या शिबिरासाठी अनुभवी योग प्रशिक्षक विभा चोरगे यांनी मार्गदर्शन केले. त्यांनी कामगारांना योगाचे दैनंदिन जीवनातील महत्त्व पटवून देत, ताणतणाव कमी करण्यासाठी ध्यानधारणा आणि शारीरिक तंदुरुस्ती राखण्यासाठी आवश्यक असलेल्या विविध योगासनांचे प्रात्यक्षिक सादर केले. सोप्या आणि प्रभावी योग पद्धतींमुळे उपस्थित कामगारांनी मोठ्या उत्साहाने सहभाग घेतला.
कंपनीचे युनिट हेड किरण हिंगणे यांच्या मार्गदर्शनाखाली आणि एचआर विभागाच्या पुढाकारातून हा उपक्रम राबविण्यात आला. यावेळी बोलताना किरण हिंगणे यांनी सांगितले की, “कामगार हे कंपनीचे खरे बळ असून त्यांचे शारीरिक आणि मानसिक आरोग्य सुदृढ असणे अत्यंत आवश्यक आहे. योगामुळे कार्यक्षमता वाढते आणि कार्यस्थळी सकारात्मक वातावरण निर्माण होते.”
तसेच एचआर मॅनेजर अनिल जांभळे यांनीही योगाचे महत्त्व अधोरेखित करत सांगितले की, “आजच्या तणावपूर्ण जीवनशैलीत योग हा अत्यंत प्रभावी उपाय आहे. नियमित योगाभ्यासामुळे शरीर तंदुरुस्त राहतेच, पण मनालाही शांतता मिळते.”
या उपक्रमाला कंपनीतील कामगार व स्टाफ मोठ्या संख्येने उपस्थित राहिले. सर्वांनी उत्स्फूर्त सहभाग घेतल्याने कार्यक्रम अधिक रंगतदार झाला. कामगारांच्या आरोग्याबाबत कंपनीची बांधिलकी अधोरेखित करणारा हा उपक्रम सर्वत्र कौतुकाचा विषय ठरला आहे.
भविष्यातही अशा आरोग्यवर्धक उपक्रमांमुळे कामगारांमध्ये सकारात्मक बदल घडतील आणि ‘निरोगी कामगार, सक्षम उद्योग’ हा संदेश अधिक बळकट होईल, असा विश्वास यावेळी व्यक्त करण्यात आला.