रोहा तालुक्यात भक्तिभावपूर्ण वातावरणात गणेशोत्सवाची सांगता

ढोल-ताशांचा गजर, लेझीम-कोळी नृत्याची रंगत; ‘गणपती बाप्पा मोरया, पुढच्या वर्षी लवकर या’च्या जयघोषात बाप्पाला भावपूर्ण निरोप

रोहा प्रतिनिधी (संतोष सातपुते)

रोहा तालुक्यात गणेशोत्सवाची सांगता अनंत चतुर्दशीच्या दिवशी मोठ्या भक्तिभावाने, उत्साहात आणि जल्लोषपूर्ण वातावरणात झाली. रोहा शहरासह तालुक्यातील विविध गावांमध्ये गणरायाच्या विसर्जन मिरवणुका पारंपरिक तसेच सांस्कृतिक पद्धतीने काढण्यात आल्या. ढोल-ताशांचा गजर, सनईचे मंगल सूर, फुलांची उधळण आणि ‘गणपती बाप्पा मोरया, पुढच्या वर्षी लवकर या’च्या जयघोषात लाडक्या बाप्पाला भावपूर्ण निरोप देण्यात आला.
विसर्जनापूर्वी भाविकांनी गणरायाची विधिवत पूजा-अर्चा व आरती केली. त्यानंतर ढोल-ताशांच्या गजरात विसर्जन मिरवणुकांना सुरुवात झाली. रोहा शहरातील गणेशमूर्तींचे कुंडलिका नदी, पकटी तसेच अष्टमी-करांनी नदी परिसरात विसर्जन करण्यात आले. वरसे, रोठ आणि उडवणे येथील गणेशमूर्तींचे पालदाद पुलाजवळ नदीत विसर्जन करण्यात आले. पडम, खारापटी आणि नीडी येथील नागरिकांनीही नाचत-गाजत उत्साहपूर्ण मिरवणुका काढून गणरायाला निरोप दिला.
मिरवणुकांमध्ये तरुणाईचा उत्साह विशेष लक्षवेधी ठरला. तरुण-तरुणींनी लेझीम, कोळी नृत्य तसेच विविध सांस्कृतिक व पारंपरिक कला सादर करून वातावरणात रंगत भरली. अनेक ठिकाणी महिलांनीही पारंपरिक पद्धतीने नाच-गाण्यात सहभागी होत बाप्पाला निरोप दिला. फुलांची उधळण, गुलाल आणि भक्तिमय जयघोषाने संपूर्ण परिसर दुमदुमून गेला.
विसर्जनस्थळी पोहोचल्यानंतर ‘गणपती बाप्पा मोरया, पुढच्या वर्षी लवकर या’च्या जयघोषात गणरायाच्या मूर्तींचे विधिवत विसर्जन करण्यात आले. बाप्पाला निरोप देताना अनेक भाविक भावूक झाले. आनंद, उत्साह, भक्ती आणि विरहाच्या भावनेने भारलेल्या वातावरणात रोहा तालुक्यातील गणेशोत्सवाची भक्तिमय सांगता झाली.