*GCC-TBC २०२७ प्रवेश प्रक्रिया सुरू; विद्यार्थी व पालकांनी सावध राहावे*

रोहा, प्रतिनिधी

महाराष्ट्र राज्य परीक्षा परिषद, पुणे यांच्या मान्यतेने घेण्यात येणाऱ्या शासकीय संगणक टायपिंग प्रमाणपत्र (GCC-TBC) २०२७ परीक्षेसाठी प्रवेश प्रक्रिया सुरू झाली असून, इच्छुक विद्यार्थ्यांनी वेळेत प्रवेश घेऊन परीक्षा अर्ज (Exam Form) दिलेल्या वेळेत भरावा, असे आवाहन करण्यात आले आहे. उशीर झाल्यास विद्यार्थ्यांना परीक्षेपासून वंचित राहण्याची वेळ येऊ शकते. परीक्षेचा अर्ज भरल्यानंतर विद्यार्थ्यांना LMS वर मोफत सरावाची सुविधा उपलब्ध करून दिली जाणार असून, मोबाईल Attendance बंधनकारक राहणार आहे.

सध्या महाराष्ट्रातील विविध शासकीय, निमशासकीय, स्थानिक स्वराज्य संस्था तसेच अनेक भरती प्रक्रियांमध्ये GCC-TBC इंग्रजी ३०/४० शब्द प्रति मिनिट व मराठी ३० शब्द प्रति मिनिट या टंकलेखन पात्रतेला महत्त्व दिले जाते. त्यामुळे सरकारी सेवेत करिअर करण्याची इच्छा असलेल्या विद्यार्थ्यांनी या परीक्षेची तयारी आतापासूनच सुरू करणे आवश्यक आहे.

कॉम्प्युटर-टायपिंग शिक्षण व कौशल्य विकास संस्था रायगड (रजि.) या रायगड जिल्हा संघटनेच्या वतीने विद्यार्थी व पालकांना आवाहन करण्यात आले आहे की, GCC-TBC ही महाराष्ट्र शासन मान्यताप्राप्त अधिकृत संगणक टायपिंग प्रमाणपत्र परीक्षा आहे. कोणत्याही खाजगी संस्थेचे टायपिंग प्रशिक्षण किंवा प्रमाणपत्र आणि GCC-TBC हे समान समजू नये. विविध भरती जाहिरातींमध्ये कोणते टंकलेखन प्रमाणपत्र ग्राह्य धरले आहे, याची खात्री करूनच प्रवेश घ्यावा.

विद्यार्थ्यांनी शेवटच्या क्षणापर्यंत प्रतीक्षा न करता शासन मान्यताप्राप्त टायपिंग संस्थेत वेळेत प्रवेश घ्यावा, परीक्षा अर्ज भरावा आणि नियमित सराव करून यशाची तयारी करावी, असे आवाहन रोहा-दमखाडी येथील सदर रायगड जिल्हा संघटनेचे सचिव राजेश श्रीवर्धनकर यांचे वतीने करण्यात आले आहे.